BAGUIO CITY (PIA) -- Magiging malaking tulong sa mga pamahalaang lokal ang pagpapatupad ng Republic Act 11898 o Extended Producer Responsibility Act of 2022.
 
Ang EPR Act ay nag-lapse bilang batas noong Hulyo 23, 2022. Iminamandato nito na magkaroon ng mekanismo ang mga malalaking kompanya para sa pagrekober ng kanilang plastic packaging para sa treatment, recycling o disposal ng kanilang mga produkto na nabenta at nagamit ng mga konsyumer. Layunin nito na mabawasan ang plastic wastes at mapalawig ang plastic life sa pamamagitan ng upcycling o recycling.

"Diyay responsibility ti disposal dagiti plastic packaging waste, maipan idjay manufacturers. Required dagiti manufacturers nga i-retrieve wenno kolektaren dagita, then dispose nila [Ang responsibility sa disposal ng mga plastic packaging waste, mapupunta sa manufacturers. Required ang mga manufacturers na i-retrieve o kolektahin at i-dispose ang mga ito]," paliwanag ni Senior Environmental Management Specialist Mark Anthony Solano ng Environmental Management Bureau-Cordillera.
 
Nakasaad sa nasabing batas na kabilang sa mga plastic packaging ang sachets, labels, laminates at iba pang flexible plastic packaging products. Kabilang din ang rigid plastic packaging products gaya ng containers para sa beverages, food, home, personal care, at cosmetic products kabilang na ang kanilang mga takip, cutlery, plato, drinking straws, sticks, tarps, signages o labels, at plastic bags.