TAGBILARAN CITY, Bohol, February 1 (PIA) -- Aron mapugngan ang dili makontrol nga pagsaka sa presyo sa mga batakang palaliton, gi-awhag ni Gob. Erico Aristotle Aumentado ang mga local government units sa lalawigan  sa pagpalig-on sa ilang price monitoring councils.

Pinaagi sa usa ka memorandum circular, gi-awhag ni Aumentado ang pagpalig-on sa price monitoring councils sa matag lungsod aron pagsubay sa presyo sa mga basic commodities hilabi na sa presyo sa isda.

Subay sa Joint Memorandum Circular (JMC) No. 3, tuig 2020 tali sa Department of Agriculture (DA), Department of Trade and Industry (DTI), Department of Health (DOH), Department of Interior and Local Government (DILG), ug Department of Environment and Natural Resources (DENR), gipahingosgan ang papel sa mga Municipal Price Monitoring Councils (MPMC).

Matud pa ni Aumentado nga ang pag-monitor sa mga presyo sa mga palaliton gikinahanglan ang hiniusang paningkamot sa tanang LGUs pinaagi sa "whole of province approach."

Ang MPMC mo-rekomendar og mosugyot og Suggested Retail Prices (SRPs), ug mag-analisa sa mga pagbag-o sa presyo sa merkado.

Gawas sa pagmonitor sa presyo sa mga palaliton labi na sa presyo sa isda, ang MPMC usab adunay gahum sa pagmugna og task force, ug pagduso og legal nga aksyon batok sa mga makalapas sa balaod.

Kalabot niini, gitahasan ni Gob. Aumentado si Provincial Legal Officer Atty. Handel Lagunay sa pag-umol og template pinaagi sa Executive Order nga e-issue sa mga mayor aron pagpalig-on ug pag re-activate sa ilang isig-ka City o Municipal Price Coordinating Councils. (ECB/PIA7-Bohol)