DUMAGUETE CITY, Negros Oriental, January 31 (PIA) -- Nagkahiusa ang Securities and Exchange Commission - Bacolod City Extension Office (SEC BACEO) ug ang Philippine Information Agency (PIA) alang sa pagpaambit og mga importanteng adbokasiya labot sa anti-investment scams ug digitalization alang sa “ease of doing business” sa Negros Oriental.

Nilagda og usa ka Memorandum of Agreement (MOA) sina PIA Negros Oriental Information Center Manager Jenny Tilos ug si SEC BACEO Head Atty. Annabell Corral-Respall aron mapormalisa ang panag-uban sa duha ka buhatan alang sa pagpalapnag sa maong adbokasiya.

Nahitabo ang paglagda og MOA kaniadtong ika-24 sa Enero human mobisita sa buhatan sa PIA sa Dakbayan sa Dumaguete ang mga kawani sa SEC BACEO.

“As the premier public information arm of the government, we are glad to assist SEC in their communication campaigns. We fully support SEC in its call for corporations to maximize the use of its digital services,” matud ni Tilos.

Tabangan sa PIA ang SEC BACEO sa pagpahibalo sa katawhan unsaon og pahimulos sa ilahang online services hilabi na ang Efast portal na makita sa ilang website, proteksyon sa mga investment scam, ug mga lakan aron makalikay sila sa mga violation sa SEC regulations labot sa mga korporasyon.

Subay niini adunay ipahigayon Capital Information Roadshow ang SEC BACEO sa Dakbayan sa Dumaguete  sa bulan sa Hunyo karong tuiga.

Tumong ug tuyo sa maong kalihukan na maedukar ang publiko sa konsepto sa crowdfunding ug mga angay buhaton kung ang usa ka korporasyon mopadayon sa gitawag na “initial public offering.”

“It’s like an investment fair. Iyon yung mangyayari (This is what will happen) this coming June,” matud ni SEC BACEO Information Officer Laarni Dilag-King.

Motambong sa roadshow ang mga kawani sa SEC-licensed intermediaries na maoy mosulti kabahin sa crowdfunding og mogiya sa publiko kon asang “crowdfunds” maayo i-invest ang ilang mga kwarta.

Mangita sab ang mga SEC-licensed nga mga Micro, Small, and Medium Scale Enterprises (MSMEs) na pwede nila sab ma-investan og kwarta ug matabangan mapalambo ang ilang negosyo.

Apil sab sa mga mosulti ang mga kawani sa Philippine Stock Exchange (PSE) na maoy mogiya sa mga korporasyon sa unsay mga angay buhaton kon gusto sila himoon “public” ang ilang mga korporasyon.

Gipanguluhan sa SEC main office ang Capital Information Roadshow na napahigayon na sab sa uban pang mga lugar sa Pilipinas.

Mangita sab ang PSE og mga korporasyon sa probinsiya na naay dakong potensyal na molambo na ila pod tabangan aron mahimong sustenable ang ilang negosyo.

Sa lain bahin, nagpahinumdom si Atty. Respall sa mga korporasyon sa Negros Oriental na motuman sa annual submission og reports sa SEC aron malikayan ang pagbawi sa ilang mga rehistro ug matawag sila'ng delinquent corporations.

“When you don’t submit, you violate the (law) but you can still continue your operations You will be penalized administratively. There will be fines for late filing or for non-filing but remember that the SEC Philippines wants SEC-registered corporations now to be a more compliant,” matud ni Atty. Respall.

Dugang niya, mahimong masuspinde ang rehistro sa usa ka korporasyon kon dili ni mosumite og mga kinahanglan na report sa SEC sa tulo ka sagunson na tuig o tulo na putol-putol na tuig.

Alang sa mga foundation na nalista isip non-stock corporation, kinahanglan pod sila mosumite og certificate of existence o magpakita og dugang na mga mga dokumento kon diin gikan ang ilang mga pondo. Wala pay labot dinhi ang General Information Sheet (GIS) ug updated financial statement sa maong organisasyon.

Alang sa mga welfare organizaton na nalista isip non-stock corporation, kinanhanglan pod sila mosumite og mandatory disclosure form kung asa gikan pod ang ilang mga pondo.

Gibutyag ni Atty. Respall na adunay 3,962 na korporasyon sa Negros Oriental na naglangkob sa mga stock corporation, non-stock, mga non-profit corporation, mga partnership, ug mga asosasyon.

“This comprises about 17 percent of the total number of SEC-registered corporations in the entire Negros Island,” matud ni Atty. Respall.

Sumala sa direktiba gikan sa SEC central office sa National Capital Region, ang SEC BACEO ang maong gitugyan alang sa pag-monitor ug pag-supervise sa tanang mga korporasyon sa Negros Island. (RAL/PIA7 Negros Oriental)