TAGBILARAN CITY, Bohol, February 2 (PIA) -- Gipadayag sa pamunoan sa Civil Service Commission (CSC) nga wala silay gi-endorso nga review material o review center alang sa Career Service Examination (CSE).
Ang maong pamahayag gihimo ni CSC Chairperson Karlo Nograles dungan sa pagpahimangno sa publiko batok sa mga review center, grupo, ug pribadong indibidwal nga naggamit sa ngalan, logo, ug website sa CSC o nagpaila nga sila gi-endorso sa nahisgutang Commission sa pagtanyag sa online ug face-to-face nga mga klase alang sa CSE Professional ug Subprofessional Levels.
Gipahinumdoman usab ni Nograles ang mga examinees nga magbinantayon sa mga review materials nga gibaligya sa mga bookstore, social media channels, ug online selling platforms, nga giingong reproductions sa aktuwal nga eksaminasyon nga gidumala kaniadto sa CSC.
“Sa tuwing nalalapit ang civil service exam, talagang naglalabasan ang mga review centers and reviewers na nag-aalok umano ng tutorials sa murang halaga. We are once again reminding the public that the CSC does not prescribe, accredit, or endorse any form of review classes nor do we produce or disseminate any review materials for the CSE. Enrollment in review centers and purchase of these products are the sole discretion of applicants,” matud pa ni Chairperson Nograles.
Ubos sa Republic Act No. 9416 o ang Anti-Cheating Law, ang dili awtorisado nga pagpanag-iya sa, ug/o ang dili awtorisado nga paggamit, pagkopya ug/o pagsabwag sa bisan unsang porma sa, mga materyales sa eksaminasyon, sa kinatibuk-an o sa bahin, sa usa ka indibidwal, pribado man o empleyado sa gobyerno, grupo. o sentro sa pagrepaso, gikan sa dili awtorisado nga tinubdan, isipon nga buhat sa pagpanglimbong. Ang bisan kinsang tawo nga makahimo sa ginadili nga buhat mahimong silotan og pagkapriso nga dili moubos sa unom (6) ka tuig ug usa (1) ka adlaw apan dili molapas sa dose (12) ka tuig ug multa nga dili moubos sa singkwenta mil pesos P50,000.00.
Alang niini nga katuyoan, ang mosunod nga mga kalihokan gidili:
Ang pagkopya sa mga pangutana sa pasulit; paggisi sa bisan unsang panid sa test booklet; pagdala sa balay sa test booklet o bisan unsang panid niini; ug uban pang susamang mga oportunidad sama sa pagkaanaa sa mga test booklet sa mga review center.
Gipahinumdoman sa CSC ang publiko nga ang mga kalapasan sa maong mga probisyon mahimong i-report sa CSC Contact Center sa syudad pinaagi sa SMS sa 0908-881-6565 o pinaagi sa email sa email@contactcenterngbayan.gov.ph.
Ang mga report mahimo usab nga ipadala sa CSC Examination, Recruitment, ug Placement Office pinaagi sa mga numero sa telepono 8951-2578 ug 8931-8163; o pinaagi sa pag-email sa erpo.ead@csc.gov.ph. (ECB/PIA7 Bohol)
