CEBU CITY, Cebu Jan. 22 (PIA) – Ang Department of Environment and Natural Resources 7 (DENR-7) padayun nga nagatabang sa mga local government units sa Central Visayas kabahin sa pagpatuman sa ilang Solid Waste Management Plan.
Ang ahensya natahasan nga motunol og technical assistance, mga pagbansay-bansay, ug mga programa nga pagahimuon aron nga makaabot ang mga LGUs sa standard sa ilang pag dispose, pag collect, og pag conduct og information dissemination campaign kabahin sa solid waste management.
Ang mga LGUs nga maoy mag-unang magpatuman sa solid waste management nakahatag na sa ilang mga 10-year solid waste management plan ug kini andam na nga ipatuman sa ilang tagsa-tagsang lokalidad.
Matod sa DENR-7, gikan sa 136 nga kinatibuk-ang mga LGUs sa Central Visayas anaa na sa 111 ang naaprubahan nga plano sa Solid Waste Management Commission kung diin ang nahabiling 25 ka mga LGUs naghuwat nalang sa deliberasyon alang sa pagaprobar sa ilang solid waste management plan.
Gikahalipay sa ahensya ang kalamboan nga nahitabo kabahin sa mga plano sa mga LGUs sa ilang solid waste management kung diin kini gisugdan niadto palang tuig 2015.
Padayun usab karon ang pakig-alayon sa DENR-7 sa mga nahabiling LGUs nga wala pa nakapa-aprobar sa ilang solid waste management plan kini aron nga makab-ot sa ahensya ang tumong nga 100% compliance sa tibuok rehiyon.
Gisaysay usab sa DENR7 ang mga hagit sa pagpatuman sa solid waste management nga mao ang disiplina sa publiko ug ang pagpadayun sa maong plano.
“Ang pinakalisud nga challenge in implementing SWM, kay ang disiplina sa tawo, ug kung unsaon natu pag continue para ma discipline ang tawo” batbat ni DENR-7 Supervising Environmental Management Specialist John Roy Kyamko atol sa gipahigayon nga “Kapihan sa PIA" forum sa Philippine Information Agency 7 niadtong Enero 17.
“Maglisud gihapon ang mga LGUs sa pag implement sa Ilang SWM plan kung ang segregation dili matarong” si Kyamko midugang.
Mahitungod niini, karong buwana usab giobserbar ang “National Zero Waste Month” nga adunay temang “Sustainable Waste Management in Livable Communities: Zero Waste to Philippine Waters by 2040"
“In order for us to join the celebration of the National Zero Waste Month is dapat atong i-minimize atong basura nga atong malabay dinha sa atong palibot. Ang ato lang kay kining atong mga basura kay ma segregate og tarong og dili maabot ngadto sa atong mga kasapaan og kadagatan” pagpahinapos ni Kyamko. (RGC/PIA7 Cebu)
