TAGBILARAN CITY, Bohol, February 5 (PIA) -- Operasyon sa suliran sa thyroid ug endocrine system nga maoy nagdala sa hormones sa lawas, operasyon sa ulo ug liog, operasyon sa totoy, katarata ug pterigium sa mata, operasyon sa apdo ug sa mga agi-anan niini, danlak, mga cysts ug tumor sa matres, paibot sa ngipon, almoranas, operasyon sa mga bata ug puya, pagpataud sa fistula ug operasyon sa ugat, pagpasukod ug pagpataud sa anteojos, operasyon sa mga hubag-hubag ug bukol-bukol, mga ginagmay nga operasyon ug ultrasound ang pipila lamang sa mga serbisyo nga tanyag sa surgical mission alang sa mga Bol-anon.
Ang libre nga medical mission mahitabo karong umaabut Pebrero 8 ngadto sa 10 didto sa Teodoro B. Galagar District Hospital sa Jagna, Bohol, ang medical mission gitanyag sa Cebu Doctors Group, Sui Generis Medical Mission Team, Emergency Rescue Unit Foundation ug sa hiniusang paningkamot ni Gobrnador Erico Aristotle Aumentado ug Bise Gobernador Victor Dionisio Balite sa lalawigan sa Bohol ug sa Buhatan sa Mayor Joseph Rañola sa lungsod sa Jagna.
Ipahigayon ang surgical mission samtang ang Bohol nagsugod na sa pagpatuman sa Universal Health Care nga maghatag na sa libre nga mga serbisyo medical gikan sa iyang mga Rural Health Centers ug 12 ka mga tambalanan nga iyaha sa Probinsya ug sa mga tambalanan nga iyaha sa nasudnong kagamhanan.
Niini, matud ni Aumentado, ang surgical mission daku usab og ikatabang kay dala niini ang mga mananambal ug mga espesyalista nga dili sarang igkita sa Bohol nga maoy makatan-aw sa kahimtang medical sa mga katawhan.
Dugang pa, daku kini og abag sa kahinguhaan sa Bohol sanglit ang serbisyo nga itanyag sa medical mission, dili kanunay dali nga makuha sa mga ordinaryong Bol-anon, ug kay libre, daku na kinig alibyo sa panudlanan sa kwarta sa mga kabus nga walay ikagasto sa mga komplikadong operasyon nga dala sa mission.
Hinuon, aron mapahiluna og maayo sa adlaw sa mission, gikinahanglan kadtong mga interesado nga mga pasyente nga moduaw una sa mga Municipal Health Office (MHO) aron mahimo-an sa pre-screening procedure ug masulod na sa listahan sa mga himoan sa gikinahanglang procedures, pahinumdom sa gobernador.
Unta dili nato palabyon kining higayon nga makapatambal gikan sa mga hanas ug espesyalista sa mga nagkadaiya nga sakit, kay gawas nga libre, dili sila permi nga ania sa Bohol, panapos ni Gob Aumentado. (RAHC/PIA7 Bohol)
