TAGBILARAN CITY, Bohol, February 5 PIA) -- Kinatibuk-an nga P2.7 milyon nga abag panginabuhian ug nga starter kits ang gitugyan sa Department of Labor and Employment (DOLE) Bohol ngadto sa pito ka mga kahugpungan sa San Miguel, Bohol.

Ang tabang para sa dugang kita kapanginabuhian natunol sa DOLE pinaagi sa DOLE Integrated Livelihood Program (DILP) ngadto sa Hagbuyo Women’s Organization, Corazon Women’s Organization, Bugang Women’s Organization, Bugang Farmers Association, San Jose Women’s Organization, Kagawasan Farmers Association, Cam-Ba-San  Irrigators Association, tanan mga kahugpungan nga accredited usab sa lungsod sa San Miguel.

Ang Hagbuyo Women’s Association napundohan sa DOLE sa ilang gitumbok nga egg production nga mikantidad og P249,928, ug nahidangat sa mga sakop niini ang mga kagamitan alang sa pagpangitlogan.

Ang Corazon Women’s Association nga mingpili sa Restaurant ug Catering Services napundohan usab sa DOLE sa P337,488.

Ang Bugang Women’s Association mipili sa Swine Fattening isip dugang sa ilang panginabuhian ug mingdawat ang grupo sa P498,482.

Dala usab sa lapad nga mga umahan sa lungsod ug  ang maayong saad sa mechanized farming, ang mga kahugpungan sa Bugang Farmers Association, San Jose Women’s Organization, Kagawasan Farmers Association, Cam-Ba-San  Irrigators Association, mipili sa pagduso sa proyekto nga pagpa-abang ug pagserbisyo sa mga gamit sa umahan nga de makina.

Kini naglangkob sa P1,638,504 nga mga ekipo sa umahan nga naglakip sa 4-wheel drive nga tractor, mga walk behind tractors ug turtle tillers, moderno nga rice threshers.

Si Labor and Employment Officer Maria Eloida O. Cantona sa DOLE Bohol maoy nanguna sa ceremonial turn-over sa nahisgutang Starter Kits sa Abag Kapanginabuhian.

Si San Miguel Mayor Ian Mendez miduyog usab sa kalihukan samtang didto usab sila Acting Municipal Agriculturist Felix Lucip, PESO Manager Yevgeny Lanoy, Agricultural Technologist Ananias Nuez ug Agricultural Technologist Artemia Y. Hamo.

"Mapasalamaton mi ug dako kaayo tungod kay usa mi sa nahimong nakadawat niining dinagkong kahimanan para sa pag-uma. Amo jung ampingan kini ug hinaot mapalambo namo ni sa among asosasyon," dayag ni Christoper Bacnotan, presidente sa Bugang Farmers Association.

Sa laing bahin, gawas nga makapahimulos sa mahimong dugang kita dala sa mga abangan ug bayad sa pagpaserbisyo sa mga makinarya, daku nga kalipay sa mga nahatagan sa grant sa mas sayon nga pagpanguma.

"Nagpasalamat kami kay mapasayon na ug mapadali usab ang pagtikad sa among mga kayutaan," dayag ni Rowena Cambangay, presidente sa Cam-ba-san Irrigators' Association.

Subay sa lagda sa DILP, ang mga kahugpungan nga nagpatabang sa DOLE, kinahanglan usab nga makapundar og kantidad sa 20% aron may ikapadagan ilang negosyo nga napili.

Apan sanglit giabagan usab sa local government unit nga maoy mipahimutang sa tugbang nga pundo, mahimong mas sayun na sa mga benepisaryo ang pagtigum sa ilang kinitaan nga dili na maglantaw pa sa ilang mga bayronon pa.

Subay usab niini, malipay si Mendez sa abag sa DOLE, kay kini maghatag og dyutay nga alibyo sa ekonomikanhong kahimtang sa mga benepisaryo ug magpa-inat pa sa kahinguhaan sa lungsod nga alang sa mga panglantaw niini sa kaugmaran. (RAHC/PIA7/Bohol)