Ginapaabot ni Presidente Ferdinand Marcos, Jr. nga mangin partner sang gobyerno ang Vietnam agud matun-an ang industriya sang electronic vehicle nga mangin kabahin sang mga salakyan sa dalanon sa pungsod sa 2040.

Sa isa ka pagtilipon kaupod si  Vietnamese Prime Minister Pham Minh Ching, ginpahayag ni Marcos nga ang pagpakilala sang electric vehicles sa sektor sang transportasyon sa pungsod ang magaresulta sa 5% nga katipiron sang enerhiya sa oil kag kuryente.

Ginpakigbahin man ni Marcos nga ang paghaylo sang pungsod sa e-vehicles ang mangin long-term multi-sectoral kag multi-stakeholders process nga nagakinahanglan sang mabakod nga suporta sa publiko kag probado nga sektor.

Nagalaum man ang presidente sang kooperasyon sa bahin sang Pilipinas, Vietnam kag bilog nga myembro sang Association of Southeast Asian Nations (ASEAN) agud masalbar ang dunang manggad sang rehiyon kag nagatubo nga ekonomiya. (AAL/LMLE/PIA Iloilo)