TAGBILARAN CITY, Bohol, February 1 (PIA) -- Irekomendar sa Sangguniang Panlalawigan (SP) Committee on Agriculture pinangulohan ni Bise Gobernador Victor Dionisio Balite ang pagtugot kang Gobernador Erico Aristotle Aumentado nga makiglagdaay sa kasabutan tali sa usa  ka ahensya sa goberno ug sa lungsod sa Sevilla aron ikapatukod ang usa ka pasilidad papus-anan sa tilapia didto sa Barangay Cabancalan Sevilla, Bohol.

Kini kalabut usab sa plano nga padaghanon pa ang supply sa isda sa Bohol agi og usa sa mga lakang sa pagpabarato sa isda nga ikapanud-an.

Kahinumduman nga natumbok sa kagamhanang probinsyal ubos ni Aumentado ang mga kalungsuran sa Valencia, Talibon, Pilar, ug Sevilla: mga lungsod nga adunay mga dams ug mga patubig, nga moabag sa tumong sa pagpadaghan sa isda dinhi sa Bohol.

Natumbok usab sa Bohol ang katukoran sa mga Tilapia Hatchery Facility sa mga kalungsuran nga usa ka lig-on ug buhi nga lakang nga trabahoon ang saad sa gobernador nga lihokon ang pagpawalay-gahum sa cartel nga nagpugong sa presyo sa isda sa kamerkadohan.

Gani, gipangandaman na sa Bohol ang ipundo alang niining proyekto, matud ni Aumentado.       

Segun sa Kapitolyo, ang pundo alang niini magagikan sa 20 porsyento nga pundo pangkaugmaran sa 2022, ug P6 milyones na ang napahat nga bahinon alang sa upat ka lungsod diin tukoron ang nahisgutang mga hatchery.

Niini nga katikaran, sa milabay nga tuig, nalagdaan na sa gobernador ang Memorandum of Agreement (MOA) tali sa Bohol, Bureau of Fisheries and Aquatic Resources (BFAR) ug sa mga kalungsuran sa Pilar ug Valencia kinsa maoy nanag-iya mismo sa mga lugar nga tukoran sa hatchery.

Nakapagawas usab ang SP  sa Resolusyon No. 2023-819, nga nagtugot ni Aumentado sa paglagda sa MOA sa katungod sa Bohol

Sa laing bahin, medyo nalangay ang paglagdaay sa Sevilla ug Talibon sanglit ang mga lugar nga tukoran sa hatchery didto, dili iyaha sa kagamhanan ug gikinahanglan pa kini nga mapahiluna aron walay legal nga pagkagulgot.

Niining bag-o lamang, nakapakita ang Municipal Government of Sevilla sa Title No. 101-2016000512 niadtong Octobre 2023, nga nagpamatuod nga ilaha na ang luna alang sa giplanong hatchery. .

Nunot niini, sa tigum sa Komitiba nga gipreside ni Board Member Lucille Lagunay, napamatud-an nga hapsay na ang mga gikinahanglan aron makalagda na ang gobernador, hinungdan sa sugyot ngadto sa SP sa pagpagawas na sa resolusyon sa pagtugot.

Nagtuo ang Kagamhanang Probinsyal nga kon gamhan ang mga kalungsuran, mamahimo usab sila nga nga gagmay nga sentro sa kaugmaran ug lig-on nga mga kaabag sa pagpa-abante sa mga inisyatiba sa agri-fisheries.

Gawas nga kining hatchery makapadaghan na unya sa isda nga tilapia dinhi sa Bohol, kini usab gilauman nga magdugang sa kita sa mga benepisaryo nga mag-uuma pinaagi sa mas taas nga kalidad ug mas dali makuha nga semilya sa tilapia. (RAHC/PIA Bohol)