ILIGAN CITY (PIA) -- Isip pagpangandam sa umaabot nga mass wedding event karong Pebrero 23, mitambong ang 88 ka pares sa pre-marriage counseling seminar nga gipasiugdahan sa City Civil Registrar's Office (CCRO).

“Para ikasal sila, dapat naay seminar mao nang nagconduct og libre nga seminar  para sa tanang couples  nga muattend sa mass wedding. Dili sila makasal ug dili sila muattend ani nga seminar,” sumala ni Lawyer Yussif Don Justin E. Martil, ang city civil registrar.

Naghatag og lecture ang mga representante gikan sa City Health Office, City Social Welfare and Development, ug mga sponsors aron hisgutan ang mga hinungdanon sa pagminyo.

May nahabilin usab nga mga slots alang sa 12 ka pares nga interesadong magpakasal sa mass wedding. Kinahanglan lang sila mobisita sa CCRO aron sila maabagan sa husto sa ilang mga kinahanglanon ug makadawat sa gikinahanglang giya.

Nalipay si Violeta Molo nga taga Barangay Hinaplanon nga makasal na sila sa iyang bana human sa 38 ka tuig nga panag-uban. Sumala niya nasunog ang kapilya nga ilang gikaslan sa Zamboanga nga niresulta sa pagkawala sa ilang mga dokumento sa kasal nga wala ma-endorso. Paambit niya nga kinahanglan silang makakuha og marriage certificate tungod kay gikinahanglan kini sa ilang anak isip kabahin sa rekisitos sa pag-loan.

 “Nagpasalamat ko’g dako nga naay ingon ani nga makasal mi nga walay bayad. Nalipay ko’g dako [I am very grateful that there is such an opportunity for us to get married without any fees. I am very happy],” she said. 

Ang maong seminar usa lang sa mga aktibidad nga gilaray alang sa pagsaulog sa ika-34 nga Civil Registration Month. Ang ubang mga kalihokan naglakip sa birth mobile registration , orientation sa proseso sa civil registration ngadto sa mga partners,   Feb-ibig Couple Photo Contest, Slogan Contest, ug uban pa. (LELA/PIA-10/Lanao del Norte)