CEBU CITY, Cebu, February 6 (PIA) -- Giawahag sa Department of Social Welfare and Development Region 7 (DSWD)  ang mga student-beneficiaries ubos sa Pantawid Pamilyang Pilipino Program (4Ps) sa magpahimos sa mga nakalain-laing tertiary education support programs sa gobyerno nga makaabag sa mga galastuhon sa pag-eskwela.

Samtang adunay mga programa ang Commission on Higher Education (CHED) para sa mga kwalipikado ug angayan nga mga kabus o ‘poor households’ nga naglakip sa 4Ps student-beneficiaries, si DSWD-7 Regional Director Shalaine Marie Lucero nag-ingon nga mamahimong mangutana ang mga 4Ps student-beneficiaries sa CHED sa mga lain-laing educational assistance lakip ang libre nga pag-eskwela sa college, libre nga technical-vocational education ug training, ang Tertiary Education Subsidy (TES), ang Tulong Dunong Program (TDP), ug uban pang matang sa Student Financial Assistance Programs (StuFAPs) para sa tertiary education o college.

“As we all know in 4Ps, beneficiaries graduate from the program once their children graduate from senior high school or turn 19, whichever comes first, and so these programs from CHED can help ease the financial burden of the family, especially for those students who aspire to pursue higher education (Sa nahibaloan natong tanan karon sa 4Ps, mogradwar ang mga benepisyaryo sa programa sa higayon nga ang mga anak nila mogradrawar na usab sa senior high school o mag-edad na og 19, kon asa man ang mauna, ug ang kining mga programa gikan sa CHED makatabang sa pagpagaan sa pinansyal nga palas-anon sa pamilya, ilabi na niadtong mga estudyante nga nangandoy nga magpadayon sa higher education),” dugang pa ni Lucero.

Nagpadala ang ahensya og written notices o pahibalo ngadto sa mga 4Ps City ug Municipal Links (C/MLs) aron masayran sa mga 4Ps partner beneficiaries ang mga nagkalain-laing education assistance nga gitanyag sa Unified Student Financial Assistance System for Tertiary Education (UniFAST) nga nagpakita sa mga kwalipikasyon ug mga benepisyo sa matag programa.

Ang UniFAST kay usa ka attached agency sa CHED nga naghiusa ug naghapsay sa mga government-funded StuFAPs. 

Makapahimos ang mga benepisyaryo sa 4Ps sa mga programa sa mga state universities and colleges (SUCs) ug sa local universities and colleges (LUCs) nga giila sa CHED subay sa Republic Act 10931 nga nag-exempt sa mga estudyante sa pagbayad sa tuition ug uban pang balayrunon sa eskwelahan.

Sa Central Visayas, lakip sa mga SUCs ang Bohol Island State University (BISU), Cebu Normal University (CNU), Cebu Technological University (CTU), Negros Oriental State University (NORSU), ug Siquijor State College (SSC).

Para sa dugang impormasyon ug detalye kabahin sa nagkalain-laing matang sa educational assistance, mamahimong mo-contact ang 4Ps student beneficiaries sa CHED pinaagi sa email nga chedro7@ched.gov.ph/unifastro7@ched.gov.ph, o sa Facebook page nga CHED RO 7, o pinaagi sa telepono na (032) 414-9194. (JAT/PIA 7)