CEBU CITY, Cebu, February 12 (PIA) -- Magpahigayon sa pag-usab ang Bangko Sentral ng Pilipinas (BSP) og Piso Caravan aron sa pag-ilis sa mga unfit ug mutilated nga mga kwarta, ugma Pebrero 13, 2024 didto sa Sibonga Sports Centrum, Sibonga ug sa Pebrero 20, 2024 sa Santa Fe Sports Complex, Santa Fe, Cebu.
Ang Piso Caravan kay usa ka inisyatibo sa BSP aron mapalawig ang pagpatuman sa BSP Coin Recirculation Program ug sa BSP Clean Note and Coin Policy.
Katuyoan niini nga kalihokan ang pagkuha sa mga unfit ug mutilated nga mga banknotes ug coins gikan sa sirkulayon aron mapulihan ug bag-o o mahimong ma-credit kini sa electronic wallet.
Gipasabot sa BSP nga matawag na unfit ang kwarta kung aduna kini daghang kunot-kunot, kupas nga imprinta, ug aduna’y mantsa.
Samtang matawag usab nga mutilated ang kwarta kung kini aduna’y gisi-gisi, mga buslot, gikit-kit sa mananap, o nadaot na.
Pagasugdan ang maong caravan gikan sa alas 9:00 sa buntag hangtod sa alas 2:00 sa hapon sa Sibonga ug hangtod alas 3:00 sa hapon sa Santa Fe.
Giawhag ang publiko sa pagdala ug pagbalik sa mga kwarta nga na-issue sugod 1995 pataas nga natago lamang o wala magamit mahitungod kay unfit o mutilated kini.
Apan gipasabot usab sa BSP nga mga kwarta nga karaan na o dugay na nga na-issue sama sa 1985 nga coins ug banknotes kay demonetized na kini ug dili na dawaton sa Piso Caravan.
Matud sa official Facebook page sa BSP, magpahigayon og Financial Learning Session alang sa publiko nga interesado ug Account Opening sa mga gusto mag-open og account sa bangko, o e-wallet sa tagsa-tagsang gikatakda nga caravan. (JAT/PIA 7)
