SAN JOSE, Antique (PIA) -- Nagapangagda ang Antique Police Provincial Office (AnPPO) sa aktibo nga partisipasyon kang komunidad kag mga lokal nga lideres sa pagtapna kang krimen.

Ginpahayag ni Police Colonel Rogelio Abran, provincial director kang AnPPO, nga kinahanglan ang suporta kang publiko sa mga inisyatibo kang kapulisan paagi sa “whole-of-nation approach” kung sa diin tanan may parte sa pagsiguro kang kahilwayan sa pungsod.

Gin-agda ni Abran ang katawhan nga mangin listo, manilag sa mga makaduruda nga hitabo sa palibot, kag magreport gilayon sa otoridad.

Pira pa sa mga kadarag-an kang AnPPO amo ang pagka-aresto kag pagsungka kang mga wanted nga persona, pagkumpiskar kang kwarta halin sa iligal nga pasugalan, pagkompiskar kang mga gamit sa iligal nga pagpangisda kag pagpangahoy, kag iban pa.

Bangud sa mayad nga performance, bahul ang pagpasalamat ni Abran sa mga katapo kang AnPPO sa anda nga dedikasyon sa pagpatigayon kang kalinong kag kahilwayan sa probinsya.

Ana man ginpalab-ot ang anang pagpasalamat sa mga miyembro kang komunidad sa andang bulig kag suporta sa mga inisyatibo kag programa kang kapulisan.

Ginpasarig man ni Abran ang mga Antiqueño kang waay untat nga ubra kang PNP sa pagsiguro kang malinong, mahilway, kag mainuswagon nga probinsya. (AGP/PSM/BPS/PIA Antique)