TAGBILARAN CITY, Bohol, February 6 (PIA) -- Alang sa mga drivers ug tig-agi-an sa mga kadalanan ilabi na sa Maribojoc paingon sa Cortes ug sa Barangay Malayo Norte paingon sa Cortes, mihangyo ang usa  ka ahensya nga mangayog dispensa sa kahasul dala sa mga ginagmay nga trabaho sa mga kadalanan.

Sa Maribojoc, matud sa Department of Public Works and Highways (DPWH), sugod sa Pebrero 8, 2024, ilang gihangyo  ang mga operators sa mga sakyanang pangpubliko ug mga drivers ug byahedor nga mohinay sa pagpadagan sa nasudnong dalan tungod sa Barangay Lincod Maribojoc, gikan sa Arctic Gasoline Station paingon sa Abatan Grill. 

Kini sanglit adunay pagahimoon nga proyekto ang DPWH nga magbungkag sa 313 metros nga aspalto ug sementado nga dalan aron isumpay kini sa upat na  ka lane nga agi-anan gikan sa tulay sa Abatan.

Ang proyekto nga gipundohan sa local nga mga tinubdan sa DPWH, daan na nga nagsugod sa trabaho diha ug karon gisibug na ngadto sa ibabaw nga bahin sa karsada.

Sa laing bahin, sa Cortes, gikan sa Malayo Norte subay sa  national Highway sa Cortes, Balilihan-Catigbian Macaas Road, kini ang tutokan sa trabaho sa DPWH.

Ang lugar, particular na sa tungatunga nga bahin sa Hangad Petron Station ug sa bag-ong munisipyo sa Cortes, himoon ang pagkubkob sa karsada ug ang pagtukod sa box culvert, kini makapahinay sa dagan sa trapiko ug makapanipis sa karsada, mao nga mihangyo ang DPWH sa paghinay ug magmaabtik samtang moagi sa nahisgutang lugar, segun pa ni Officer-In-Charge District Engr. John Paul Gascon.  (RAHC/PIA7 /Bohol)