SYUDAD SANG ILOILO (PIA) -- Ginpangunahan sang National Task Force on the West Philippine Sea (NTFWPS) ang pagsugod sang pungsodnon nga roadshow nga nagatuyo pamatokan ang patalang nga mga impormasyon kaangot sa West Philippine Sea.

Sa labing una nga pulong-pulong nga ginpatigayon sa San Juan, La Union, ginpakigbahin sang mga opisyal sang NTFWPS ang lihok sa pag-edukar sa mga Pilipino sa ila kinamatarong kag interes sa bugana nga rehiyon sang kadagatan nga gina-angkon man sang pungsod Tsina.

Nagpakigbahin sa roadshow sanday Philippine Coast Guard Commodore Jay Tristan Tarriela, Attorney Fretti Ganchoon sang Department of Justice, kag PIA Deputy Director-General Adolfo Ares Gutierrez.

Ginhatagan punto ni Malaya nga bisan pa malayo ang mga Pililpino sa South China Sea, may hilabot ang mga ini sa ginapakig-awayan nga teritoryo.

Nagpaandam man ini sa mga aksyon sang Tsina nga mahimo makatuga sang peligro sa seguridad sang pagkaon sa pungsod pinaagi sa pagguba sang mga palangisdaan nga nagahatag sang bastante nga suplay kag palangabuhian sa minilyon nga katawhan sang Pilipinas.

Dugang pa ni Malaya nga importante ang food security sa national security angay nga kon magkulang ang suplay sang pagkaon bangod sang restriksyon sa pagpangisda sa lugar, mahimo ini makatuga sang problema sa bug-os nga pungsod.

Naghatag man ang opisyal sang suhestyon nga ang reserba sang langis nga gatong sa lugar mahimo nga makapasanyog sa ekonomiya sang Pilipinas.

Pahayag pa ni Malaya nga samtang nagapabutyag sang iya sovereignty claims ang Pilipinas sa ginapakig-awayan nga teritoryo, padayon man ini sa paggamit sang diplomatiko nga pagpakig-bahin sang pagpamatok sa militar nga pamaagi bilang pagsunod sa prinsipio sang Konstitusyon.

Apang ang pwersa-militar sang pungsod padayon man sa pagpabaskog sang pangontra sa mga pagpamahog pinaagi sa modernisasyon kag bag-o nga mga security partnerships upod ang iban nga mga pungsod.

Nagatuyo ang roadshow nga pamatokan ang kampanya sang Tsina nga nagapamahog sa terrorial claims sang Pilipinas.

Walay sapayan sang 2016 international tribunal ruling nga naga-imbalido sa ginpalapad nga “nine-dash line” nga gingamit sang Tsina sa pag-angkon sang ila maragtason nga kinamatarong sa South China Sea, padayon ang Beijing sa pagpanginwala sa nasambit nga desisyon kag nagapatigayon sang pwersahan nga tikang sa sulod sang exclusive economic zone sang Pilipinas.

Matandaan nga nagpasaka ang pungsod sang panibag-o nga protesta sa ‘ilegal nga presensya’ sang mga research ship kag warship sang Tsina malapit sa gina-ukopahan nga mga isla kag kadagatan nga sakop sang pungsod.

Nagapabilin man nga importante nga pagtilaw ang WPS nga isyu sa pamunoan ni Presidente Ferdinand R. Marcos, Jr., humalin sang nagpungko ini sa pwesto sang 2022. (AAL/FRG/PIA 6)