SYUDAD SANG ILOILO – Nagahanda na ang syudad kaupod ang Iloilo Festivals Foundation Inc. (IFFI) para sa pagahiwaton nga ika-51 nga edisyon sang Paraw Regatta Festival sa Pebrero 25 tubtob Marso 3.

Sa isa ka press conference sang Pebrero 5, ginpahayag ni Dr. Roberto Samosa, chairman sang Paraw Sailing Event nga magabukas ang selebrasyon sa baybayon sang Villa sa distrito sang Arevalo kung sa diin ang mga publiko ang sarang makataan-aw sang manami nga disenyo sang mga paraw.

Sa pihak nga bahin, ginpahayag naman ni Engr. Fulbert Woo, co-chair sang selebrasyon, nga kaangay sang Dinagyang Festival, magahatag man sang dugang nga pangitan-an sa mga pumuluyo nga magaresulta sa pagsanyog sang ekonomiya ang paghiwat sang Paraw Regatta Festival.

“I think all festivals in Iloilo will be beneficial for us, not only the MSMEs, but the big industries. If we look at it, small establishments get their resources from big businesses, so there is really support from the private sector. Through these activities we can create a network of investments and an economic drive for the city and province of Iloilo,” siling ni Woo.

Pila sa mga balantayan sa selebrasyon amo ang Sinamba sa Regatta, Beach Sports, Paraw High Intensity Interval Training sa Marso 2; Paraw Duathlon, Paraw Beach Bodies, Paraw Regatta Job Fair, Pinta Tawo, Pinta Layag, Paraw Lechon Contest, Paraw Foodfest, kag ang highlights nga Paraw Sailing Competition.

Ginakabig ang Paraw Regatta ang nga "oldest sailing event" sa pungsod kag sa Southeast Asia. (AAL/JNH/PIA Iloilo)