TAGBILARAN CITY, Bohol, February 6 (PIA) -- Gawas sa pagseguro sa BLOWBAGETS sa dili pa momaneho sa sakyanan nga de-motor o de-makina, hinumdumi kon ang magmanego, may lisensya ba ug  ang sakyanan rehistrado ba.

Kini ang panapos nga pahinumdom ni Master Sgt. Aljohn Sayson sa Highway Patrol Group (HPG) sa Philippine National Police sa Kampo Dagohoy.

Ang pahayag ni Sayson natyempo usab sa nagpanghitabo nga nagpadayon nga operations sa Land Transportation Office Region 7 dinhi sa Bohol.

Didto sa senemanang programa sa Strategic Information Broadcasting through the Internet and other Access (SIBIA) nga gilivestream gikan sa Philippine Information Agency Bohol Information Center Studio, gibutyag usab sa opisyal sa HPG nga usa sa anaa sa ilang mandates mao ang pagseguro nga luwas ang mga byahedor sa kadalanan.    

Niini, pahinumdom niya: ang tamdanan sa luwas ug sayun nga pagbyahe.

• Battery: seguradohon nga kini hugot nga naga-ipit ang mga poste niini aron dili mahubas ug mamatay ang sakyanan kay nahutdan sa koryente.
• Lights: Susihon ang mga suga: headlights nga may high ug low, signal lights nga dili ponder, hazard lights, auxiliary lights, fog lamps, daylight running lights, ug reserba nga bombilya alang niini.
• Oil. Adunay regular nga higayon alang sa change oil, ug kinahanglan nga kalingawan usab og susi kon aduna pa bay oil ang makina pinaagi sa pagsubay sa oil dipstick, aron dili madaut ang makina samtang nagbyahe nga walay oil.
• Water. Kinahanglan usab nga masubay ang tubig sa radiator, aron mapugngan ang wala kinahanglana nga overheating sa makina.
• Brakes. Subaya ang brakes kon kaya pa ba niini pahunongon ang sakyanan sa saktong distansya, kay ang kaluwasan sa driver ug pasahero, nagsandig niini.
• Air. Susiha ang air intake, kini makaingon nga dili maayong motrabaho ang air conditioning sa sakyanan, u gang sakto nga sahug sa hangin sa makina, moepekto sa kamaayo sa dagan ug konsumo sa gasoline sa sakyanan.
• Gas. Seguradoha nga magpakarga sa gikinahanglan nga kadaghanon sa gas alang sa byahe. Ang gasoline nga mas limpyo, mas maayo sa makina, ug subaya usab ang linya sa gas kon wala bay buslot, o putol, ang fuel pump wala bay problema.
• Engine. Seguradoha ng kondisyon sa makina kanunay. Ang dyutay nga suliran sa makina, modaku kini kon dili tagdan, hangtud nga kini maoy maghimo og daku ug mahal nga suliran. Subaya usab ang engine coolant, aron dili maka-overheat. 
• Tire. Ang ligid nga kuwang sa hangin, mas makapahagu sa makina ug makapadaku sa tubil. Ang sobra ka puno nga ligid, mahimong maoy kina-ingnan sa pagbuto sa ligid.
• Self. Daghan nga disgrasya sa kadalanan ang kondisyon sa nagmaneho ang hinungdan. Ang driver nga gikapoy, dili gyud makalahutay samtang ang driver nga mubo og pasensya sa dalan, duol sa disgrasya. Magpabiling mabugnawon, tambag ni Sayson.

Gawas niini, ug sa dili pa molingkod sa sakyanan, seguroha nga ang driver sisensyado nga mogamit sa mao nga matang sa sakyanan, may igo nga kasinatian nga kasaligan ug  ang sakyanan, rehistrado, awhag niya.

Ang rehistrado nga sakyanan maoy labing tataw nga seguridad nga ang mga parte niini lig-on, ug angayan pa kini nga mobyahe sa kadananan.

Subay sa Land Transportation and Traffic Code sa nasud, ang pagmaneho  nga walay gihuptang lisensya makamulta og P3,000 samtang ang pagpaneho sa sakyanan nga wala marehistro makamulta og P10,000. (RAHC/PIA7 Bohol)