CEBU CITY, Cebu, February 13 (PIA) – Ang Regional Tripartite Wages and Productivity Board (RTWPB7) nga attached agency sa Department of Labor and Employment (DOLE) nag-awhag sa tanang mga kasambahay ug kasambahay employers sa pag-apil sa survey nga ipahigayon sa ahensya aron mahibal-an ang kahimtang ug ang nag-una nga sweldo.

Gipasabot ni DOLE7 Regional Director Lilia Estillore nga ang survey nagtumong usab nga masayran ang panginahanglan sa mga kasambahay lakip na ang mga employer.

Dugang pa ang resulta sa maong survey makatabang sa RTWPB7 sa pagtino sa panginahanglan sa pag-adjust sa minimum nga suholan sa mga Kasambahay ug sa pagtimbang-timbang kon sa unsang paagi nga makatabang pa ang DOLE ngadto kanila.

Kutob karong Pebrero 29, 2024 ang maong survey ug sa buwan sa Marso o Abril, pagahisgutan ang suholan sa Kasambahay.

Makatabang ang maong resulta sa survey sa desisyon sa RTWPB.

Giawhag ang mga kasambahay ug mga employer nga mobisita sa opisyal nga Facebook Page sa Regional Tripartite and Productivity Board Region 7 para sa link o QR Code sa survey para sa mas dali nga pag-sumitir. 

Ang kasamtangang minimum nga sweldo sa mga Kasambahay anaa sa P5,500 sa mga syudad ug first class nga munisipyo ug P4,500 usab sa ubang lungsod. 

Miepekto ang kasamtangang minimum nga sweldo niadtong Hunyo 14, 2022 lamang.

Atol sa mga public hearings nga gihimo sa mga mamumuo sa pribadong establisyemento niadtong Hulyo hangtod Agosto 2023, gidesisyonan nga ilangan lang ang resolusyon sa umento sa suholan sa kasambahay samtang naghulat sa dugang pang pagtuon sa maong butang. (JAT/PIA 7)