DUMAGUETE CITY, Negos Oriental, Feb. 16 (PIA) -- Gipahigayon usab ang Kadiwa ng Pangulo sa Department of Agriculture (DA) – Negros Oriental dinhi sa dakbayan.

Nikabat sa 25 ka kahugpungan sa mga mag-uuma ug ubang mga grupo na suportado sa DA ug uban pang buhatan sa gobyerno ang namaligya sa ilang mga produkto sa baratong presyo sa Kadiwa na gipahigayon atubangan sa may Kapitolyo kaniadtong ika-15 sa Pebrero.

Mapalit sa Kadiwa ang nagkadaiyang mga utanon, prutas, isda, processed food products, ug National Food Authority (NFA) rice na nagkantidad og P25 matag kilo.

Upat ka kilo ra ka kilo hinuon nga NFA rice ang mapalit sa matag konsyumedor.

Matod ni NFA Negros Oriental Branch Manager Benilda Fidel, gisugtan sila sa ilahang uluhang buhatan na mamaligya og NFA rice sulod sa usa ka adlaw alang sa Kadiwa bisan pa wala na sa ilang mandato ang pamaligya niini.

“I’m proud to say that this is locally procured from our local farmers. Galing (pa ito) ng Mabinay, Bais City, Guihulngan City, at Bayawan City. Bagong giling ang bigas na binebenta natin ngayon,” matud ni Fidel.

Dili lang ang mga konsyumedor ang mga makabenipisyo sa Kadiwa kon dili apil na sab ang mga mag-uuma sanglit diritso nila ang tanan nilang ginansya.      

“Barato gud nis tanan kay nawala naman dinhi ang middle man. Usa ni ka marketing strategy o marketing platform na tagaan nato og kahigayinan ang atoang mga mag-uuma na makabaligya diretso sa mga konsyumedor,” matod ni DA Provincial Agricultural Program Coordinating Officer Alejandro Rafal.

Usa sa mga mag-uuma na namaligya sa Kadiwa si Josephine Remorca na president usab sa Kapinyahan Farmers Association sa lungsod sa Amlan.

Matud ni Remorca, dako ang halin sa ilang pinya pinaagi sa Kadiwa ug sugyot niya nga ipadayon kini aron matabangan sila mga mag-uuma.

“Ganinang buntag hangtod karon na oras naa namo almost P8,000 (nga halin). Ang labing maayo nga ang tanang mag-uuma gikan sa ilahang mga umahan makabaligya pod sila dire ingon ani sa Kadiwa ng Pangulo,” matud ni Remorca.

Sumala ni Rafal, ang Kadiwa ng Pangulo, ang pang-abotsa DA ug uban pang buhatan sa gobyerno sama sa Department of Trade and Industry (DTI), Department of the Interior of Local Government (DILG), Department of Labor and Employment (DOLE), Department of Social Welfare and Development (DSWD), ug Provincial Government of Negros Oriental alang sa panghatag og panginabuhi sa nagkadaiyang kahugpungan, labi na sa mga mag-uuma.

Gawas na makatabang kini sa publiko, katumanan usab kini sa saad ni President Ferdinand “Bongbong” Marcos Jr. nga makapalit og barato nga mga produkto.

Subay sab ni sa Memorandum Circular 2024 – 004 na gilagdaan ni DILG Sec. Benhur Abalos na midirekta sa kada lokal na kagamahanan sa matag lungsod ug siyudad na mopahigayon og ilahang kaugalingon Kadiwa ng Pangulo matag akinse ug atrenta kada bulan.

Gawas sab sa pamaligya og ilahang mga produkto, naakadawat sab ang mga exhibitor og P400 financial assistance gikan sa DOLE pinaagi sa ilahang TUPAD program. (RAL/PIA7 Negros Oriental)