SYUDAD SANG ILOILO -- Mahimo nga makabaton ang mga apektado nga mangunguma kag mangingisda sa probinsya sang Iloilo sang mga nanarisari nga bulig nga ginatanyag sang gobyerno probinsyal bangod sa epekto sang El Niño.   

Sa isa ka Provincial Disaster Risk Reduction Management Council (PDRRMC) nga sinapol, ginpahayag ni Provincial Agriculturist Dr. Ildefonso Toledo nga may yara sang gin-alokar nga pundo nga nagabalor sang P92,731,000 para sa mga interventions kag programa nga kinahanglanon sa pagsuporta sang industriya ilabi na sa tinion sang kalamidad.

Nalakip sini amo ang hybrid rice production, inbred rice seed production, irrigation, balance fertilization support, buffer stocking sang agricultural supplies, seed production machinery kag infra support, kag Jalaur premium rice production project.

Ginpakigbahin man ang paghatag sang insurance premium subsidy nga ginkilala bilang Sustainable Insurance from the Government for Upscaling and Revitalizing the Agri-Fishery Development and Opportunities (SIGURADO) nga naglab-ot sa P15 ka milyon. Tinutuyo sang ini nga pundo nga maghtag sang dugang nga insurance coverage para sa mga mangunguma kag mangingisda sa probinsya.

Suno kay PAGASA weather specialist Engr. Ferdinand Rubin, padayon nga mabatyagan ang dry spell sa probinsya sang Iloilo kag iban nga bahin sang rehiyon.

Nagakahulugan ang dry spell sang tatlo ka bulan nga sunod sunod ang below normal rainfall condition nga may 21-60% nga kakulangan sa average rainfall.

Ginabanta man ang near normal rainfall conditions sa bulan sang Hunyo kag Hulyo except sa mga probinsya sang Antique, Guimaras, kag Iloilo.

Sa pihak nga bahin, sa isa ka media interbyu, ginpahayag ni Gov. Arthur Defensor Jr. nga ang mga lihok batok sa El Niño naangot na sa mga programa sang provincial agriculture and fisheries extension system.

“It is composed of strategies and solutions. For the strategy, we focused on the rice hybrid rice program in the irrigated areas so that our high yield variety will be maximized,” sambit ni Defensor sa press conference. (AAL/LMLE/PIA Iloilo)