SYUDAD SANG ILOILO (PIA6) -- Nakapatigayon ang Iloilo City Police Office (ICPO) sang 358 tanan ka positive anti-illegal drugs operations sa syudad sang CY 2023, kung sa diin ini ang mas mataas sang 181.89% kung ikumpara sa 127 ka mga operasyon sang 2022.

Ini ang ginpahayag ni Police Lieutenant Colonel Lindley Barrientos, Deputy City Director sang ICPO, sa ginhiwat nga 1st Regular Joint Meeting sang Iloilo City Peace and Order Council kag Anti-Drug Abuse Council sang Pebrero 21, 2024.

Sa datos nga ginpresenta ni Barrientos, naka-aresto ang ICPO sang 580 ka targets sa bug-os nila nga operasyon batok sa ilegal nga droga kung sa diin yara naman sa 9,619.9743 grams sang “shabu” (Methamphetamine) ang nakolekta.

Suno kay Barrientos, ang implementasyon sang patrol deployment plans sa pila ka lugar ang nakabulig sa pagpanubo sang crime incidents sa syudad.

"The intensified law enforcement operations and the unprecedented support of the LGU and other stakeholders to the ICPO's anti-criminality initiatives redounded to the improvement of the community's security and safety," dugang pa sini.

Sa pihak nga bahin, gindayaw man ni Iloilo City Mayor Jerry P. Treñas ang ICPO, Philippine Army, kag Coast Guard bangud sa ila suporta para masiguro ang kalinong sa palibot, ilabi na sang Dinagyang Festival kag selebrasyon sang Chinese New Year.

"They have handled the Dinagyang very well. We did not hear of any serious incident and we handled it very well, including the Chinese New Year. This coming March, we are going to have Paraw Regatta Festival, and I hope it will be the same," pahayag sang alkalde. (AAL/JNH/PIA Iloilo)