SYUDAD SANG ILOILO (PIA) -- Naglab-ot na sa 40,450 ka mga printable ukon digital version sang Philippine Identification (ePhilIDs) ang napanagtag sang Philippine Statistics Authority (PSA)-Guimaras Provincial Statistical Office sa probinsya sang 2023.

Ginsiling ni Provincial Statistics Officer Nelida B. Losare nga ang paglapaw sa ila tuigan nga target nga pagpanagtag sang 29,940 ePhilIDs kag paglab-ot sang 135.10 porsyento sa ila accomplishment isa ka milestone sang nagligad nga tuig nga ila ginapabugal.

Sa 40,450 ka mga ePhilIDs nga ginpanagtag, 1,547 ka mga tagbaton nakuha ang ila ePhilIDs pinaagi sa mode 1, samtang ang 38,903 nabaton ini nila pinaagi sa mode 2.

ePhilIDs sa mga scheduled barangay.

Samtang sa kabilugan nga ePhilIDs issuances kag deliveries, 11,135 ang gindeliver sa Nueva Valencia, 6,389 ePhilIds sa Sibunag, 7,427 sa Jordan, 11,007 ePhilIDs sa Buenavista kag 4,492 sa San Lorenzo.

Pormal nga nagsugod ang pagpaguwa kag pagpanagtag sang ePhilIDs sang Oktubre 3, 2022 sa pagtuman sang direktiba ni Presidente Ferdinand Jr. Marcos nga magprinta sang 50 ka milyon nga Philippine Identification (PhilIDs) tubtub katapusan sang 2022 nga may 30 ka milyon nga PVC kag 20 milyon nga paper type kilala bilang printed ePhilIDs.

Suno kay Losare, ang ePhilIDs may kasubong man nga functionality kag validity sa physical card, kag libre. Bisan nga nakuha na ang printed ePhilIDs, ang mga nakarehistro nga tawo magabaton man gihapon sang ila physical card.

Agud makakuha sang na-imprinta nga ePhilID, ang aplikante dapat nga magkumpirmar sang availability sang ila transaction number sa ila transaction slip nga ginhatag pagkatapos nga makumpleto ang step 2 registration.

Gindugang pa ni Losare nga pinaagi sa mode by appointment ang aplikante mahimo nga magtalana sang appointment pinaagi sa paggamit sang link nga appt.philsys.gov.ph sa pinakamalapit nga PhilSys Registration Center (RC) ukon via walk-in for printing." (AAL/LAF/PIA6- Iloilo/PSAGuimaras)