TAGBILARAN CITY, Bohol, Feb. 20 (PIA) -- Kinatibuk-ang 22 ka ordinansa ug 1,102 ka resolusyones ang natala nga accomplishment sa ika 29 nga Sangguniang Panlalawigan, subay sa taho sa Sangguniang Panlalawigan Secretary, dili pa dugay.
Sa nahisgutang taho ni SP Secretary Bonifacio Quirog, sa mga napalusot nga mga ordinansa, labing daghan niini ang pag-bansay sa gahum sa pagpahat sa kahinguhaan sa kagamhanan aron magamit kini alang sa mga proyekto ug programa nga gitumbok nga prayoridad sa administrasyon ni Gobernador Erico Aristotle Aumentado ug Bise Gobernador Victor Dionisio Balite.
Gawas sa labing tataw nga pagpahat sa tinuig nga budget sa Bohol nga mikabat sa P4,096,338,593 o P4B nga General Fund ug P13,803,374 alang sa pagpadagan sa local nga pamuhunan niini sa Café Caloy, nakapalusot usab ang SP sa unom ka supplemental budget sa giaprobahan nga budget sa miaging tuig, matud pa sa kasayuran nga gipaambit ni Quirog.
Sa P3.9B nga budget alang sa 2022, nga giingon nga menos og 8 porsyento sa budget sa 2021, mikabat sa P721,820,241 usab ang nadugang subay sa gipagawas nga unom ka mga supplemental budgets taman sa Disyembre 2023.
Ang mga supplemental budgets subay sa ordinansa, mao ang P169 M nga anaa sa Provincial Ordinance No. 2, series of 2023 alang sa priority programs and projects, Provincial Ordinance No. 6 nga nagpahat og P175M, ug lain pang P213M supplemental nga nga anaa sa Provincial Ordinance No. 11 alang gihapon sa mga priority programs and projects ug activities sa Bohol.
Duha pa ka mosunod nga Supplemental ang gipalusot sa Provincial Ordinance No. 15 nga nagpahat og P50M samtang gisundan pa sa Provincial Ordinance No. 16 nga nagpahimutang sa P59M sa susamang galastohan.
Pagka-abut sa Disyembre, gipalusot na usab ang Supplemental Budget No. 6 nga nagkantidad og P53M alang sa Service Recognition Incentives sa mga empleyado ug Gratuity Pay sa kwalipekadong trabahante nga gipaagi sa service contarcts ug job orders.
Nagpagawas usab og Provincial Ordinance No. 1, nga naghatag og pahalipay sa mga Bol-anon nga mihatag dungog sa lalawigan sa ilang pagkuhag dagkong marka sa mga board exams, Provincial Ordinance No. 3 nga naghatag hinabang sa mga namatyan, ug Provincial Ordinance No. 20 nga naglatid sa libre nga paggamit sa ambulansya sa mga tambalanan nga iya sa provincial government.
Sa natad sa kultura, nagpalusot ang SP sa Provincial Ordinance No. 8 nga nagpahiluna sa tinuig nga Ubi Festival, Provincial Ordinance No. 13 nga nagpatunhay sa Kultura, Kapanulundan ug Kinaiya sa Eskaya ug ang kapanginabuhian didto ug ang Ordinance No. 15 nga nagpahiluna sa pag-ugmad sa ubi.
Sa luwas nga mga katilingban, napanday ang Provincial Ordinance No. 5 nga naghimong sistema ug institusyon sa Disaster Risk Reduction Management sa Health, nag-amendar ang Provincial Ordinance No. 6 sa African Swine Fever Prevention Ordinance, ug ang Provincial Ordinance No. 10 nagmugna sa SP Committee on Climate Change ug Disaster Risk Reduction, ug ang Ordinance No. 18 nga nagdeklara sa Bohol nga environment friendly ug pagsuporta sa renewable energy.
Sa pagpalig-on sa sistema sa health care, gipanday sa SP ang Ordinance No. 4 nga naglatid sa paggamit sa hemodialysis machines alang sa may suliran sa kidney, pagpahingalan sa Francisco Dagohoy Memorial Hospital pinaagi sa Provincial Ordinance No. 19, nga naglatid sa bag-ong balayranans a mga serbisyo sa mga tambalanan nga iya sa Bohol.
Sa pagpanday sa dugokan sa kaugmaran, gipasupot sa SP ang paghapsay sa mga amoroso nga mga proyedad ug sa pagrepaso nagdto sa pagpaamendar sa bag-o nga revenue code. (RAHC/PIA Bohol)
