TAGBILARAN CITY, Bohol, Feb. 14 (PIA) -- Dili angay kahadlokan ang gitukod nga Salaam Police Advocacy Group (SPAG).

Ang Salaam, matud pa ni Cpl. Jonald Avinido, provincial coordinator sa SPAG, nagagikan sa Arabic nga pulong nga kalinaw, ug kasagarang gilitok kon makighimamat sa laing tawo.

Bisan pa kon ang SPAG kasagaran gisakopan sa mga Muslim nga pulis, may mga sakop usab sa SPAG nga dili pulis, may mga Muslim ug may mga kristianos usab, matud ni Avinido, atul sa Strategic Information Broadcasting through the Internet and Other Access (SIBIA) nga live streamed sa PIA Bohol Information Center Studio.

Gawas nga ang SPAG maoy magpahigayon aron may maayong relasyon ang mga Kristyanos sa katilingban sa mga Muslim, sila usab ang magtutok sa mga kalihukan ug nga hisgutanan sa mga Muslim lakip na ang mga pasangil sa pagdaug-daug sa mga Muslim ug ang pasangil nga sila mga terorista.

Ang SPAG usab magpilo-pilo sa pwersa sa kapolisan nga makatabang sa pagpatunhay sa kalinaw ug kahapsay, ilabi na sa pagpatuman sa mga programa sa kapolisan subay usab sa ilang mandatus, dugang pagpasabut ni Avinido, pulis nga kanhi Kristiano ug karon Balik-Islam.

Natukod niadtong panahon ni kanhi Presidente Gloria Macapagal Arroyo kanus-a, daghang kalihukang pang terorismo ang napahid sa mga Muslim sa sulod ug gawas sa nasud, ang SPAG, magpaseguro nga katabangan ang katawhan sa pagpasabut nga dili usab tanan nga Muslim, terorista.

Segun sa letter of instruction sa pagtukod sa SPAG, nga karon anaa ubos sa Directorate for Police Community Relations, gitahasan ang SPAG sa pagmonitor, pagpakigtinabangay, ug pagpasumpay sa mga Muslim communities ilabi na sa pagbuntog sa terorismo, mga kagubot sa ila usab nga mga lugar aron ipaneguro nga walay Muslim nga madaugdaog.

Nunot niini, ang SPAG ang matahasan sa paghimo og padayong nga Information Education ug Communication (IEC) ngadto sa nagkadaiyang Muslim communities sa Bohol aron sayran sila sa ilang mga katungod isip Muslim ug mga obligasyon nunot sa maayong molupyo.

Alang sa kasayuran sa tanan, ang SPAG maoy magsumpay kanato ngadto sa Muslim Communities aron sila makatabang sa pagbuntog sa terorismo ug kriminalidad, dayag ni Avinido.

Matud niya kasamtangan nga may 14 na ka Muslim communities ang ania sa Bohol karon ug sobra na sa duh aka libo ka mga pamilya nga ania sa Bohol.

Labing daghan kanila, ania sa Tagbilaran diin gibanabana nga sobra sa usa ka libo ka pamilya ang nanimuyo sa upat ka communities sa Muslim Village pinangulohan ni Taha Malabi, sa Islamic Muslim Community uban ni Alangadi Demacota, sa Darrusalam Muslim Community uban ni Abidin Macalayo ug ang Unitop Muslim Community.

Sa Jagna, may kapin usab sa 500 ka banay nga Muslim nga nanimuyo sa Norul Hidaya uban ni Ali Akbar Maruhom ug sa Al Nashri uban ni Amalam Abbas.

May mga Muslim Communities usab ang Ubay, Tubigon, Catigbian, Batuan, Talibon, Trinidad, Clarin, Baclayon ug Inabanga, saysay ni Avinido.

Dinhi usab nga mga communities may mga SPAG na nga natukod ug abtik nga nakig-alayon sa mga kapulisan, alang sa kalinaw. (RAHC/PIA7 Bohol)