KAUSWAGAN, Lanao del Norte (PIA) -- Daghan pang rides ang pwede pa ma enjoy sa mga residente ug turista sa Longest Boardwalk and Amusement Park ning lungsod.

Kini human ang management gitugyan ngadto sa Carron Amusement Rides Corporation, usa ka nag-unang manufacturer ug major nga supplier sa imported ug locally-manufactured amusement rides sa Pilipinas. Uban sa kahanas sa Carron sa industriya, sigurado nga makahatag ug kalipay ang park sa mga bisita.   

Sa pag-ila sa panginahanglan sa kahanas sa pagdumala sa maong negosyo, 

Nakigtambayayong ang lokal nga kagamhanan sa Carron para mas mapalambo ang mga operasyon sa parke ug magdungag pa og mga bag-ong rides.

“We know that the local government unit (LGU), which currently owns and will continue to own this, is not an expert on this. We tried to manage it for a year, but we realized the need for a third party, the experts.  We contracted with Carron Management, which specializes in amusement parks,” sumala ni Mayor Rommel Arnado.

Gipasalig usab sa mayor nga safe nga destinasyon ang Kauswagan.

"I can assure everybody that when you come to Kauswagan, you will all be secure. The place is very peaceful. Hindi kami mag-iimbita dito kung delikado ang situation. But we know the situation around here. We are inviting everybody to come to Kauswagan and experience the rides under new management," sumala niya. 

Gipaambit usab sa mayor nga  magtukod sila og waterpark sa laing lokasyon sa lungsod. Dugang pa, magtukod pod og mga ziplines nga moabot sa Fisherman's Wharf Food Park and Entertainment Center, ug usa ka ruta sa tren nga moabot sa Kauswagan International Organic Convention Center.  

Samtang, gisiguro ni Carron Sales and Marketing Operations Manager Rossler Abescoro nga prayoridad nila ang kaluwasan alang sa mga riders.

"Number one talaga ang safety natin. Dumaan kami sa mga training para ligtas ang mga bata,” sumala niya. 

Anaa sa 17 ka mga lokal nga trabahante ang gi-hire para sa lain-laing tahas sama sa operators, cleaners, maintenance personnel, ug cashier.

Usa lamang sa mga nibista sa relaunching si Kevin Pasculado, nga taga-Iligan City. Uban niya iyang mga higala gikan sa Sapad ug Baroy nga mga lungsod.

“Nindot kaayo. Karon naa nay music, rides, ug food, stalls. Nindot siya naa pud mu-welcome. Na-enjoy mi. Ang Kauswagan, isa jud sa mga laaganan sa akong mga kaila, friends. Sige sila’g balik-balik diri kay very welcoming ang mga tawo,” sumala niya. 

Kaniadto usa lang ka pantalan ang 400-metros nga boardwalk. Na-improve kini pinaagi sa Performance Challenge Fund nga nakuha sa LGU tungod sa makanunayon nga pag-ila niini sa Seal of Good Local Governance (SGLG). Ang SGLG usa ka pasidungog nga gihatag sa mga LGU sa Pilipinas nga nagpakita sa talagsaong pasundayag sa mga lugar sa pagdumala.

Ang parke bukas gikan sa Biyernes hangtod sa Domingo, gikan sa alas 2:00 sa hapon hangtod sa alas 10:00 sa gabii. Lainlain ang presyo sa mga sakay, diin ang carousel, balloon wheel, picaroon, ug express train rides nagkantidad og P50 matag usa, samtang ang sky bike nagkantidad og P350. 

Aduna sab libreng playground para sa mga bata. Ang entrance fee kay P10, nga adunay libreng admission alang sa mga person with disabilities ug senior citizens. Aduna sab nagkadaiyang promo packages  lakip ang 5+1 ug 12+3 promos, ingon man ang birth month promo. Dugang pa, adunay Ride-All-You-Can pass nga P350, nga naglakip sa entrance fee, unlimited access sa kiddie rides, ug one-time access sa sky bike. (LELA/PIA-10/Lanao del Norte)