TAGBILARAN CITY, Bohol, Feb. 7 (PIA) -- Sa nagkadaghan nga binu-ang karon, kon mopalit og second hand nga sakyanan, sa dili pa magbinayranay, ipa record-check una sa Philippine National Police Highway Patrol Group (PNP-HPG) aron dili magmahay.

Kini maoy tambag ni Master Sgt. Aljhon Sayson, representante sa Bohol HPG, kinsa ming guest sa Strategic Information Broadcasting through the Internet and Other Access (SIBIA) nga gidumala ni Lt. Col. Norman Nuez ug Cpl. Aldrin Palaca.

Ang SIBIA programa sa Bohol Provincial Police Office Police Community Affairs and Development Unit isip public affairs program nga live stream sa Philippine Information Agency Bohol Information Center studio ug nga gisibya matag Martes.

Ang tambag ni Sayson, mahimong mahinungdanon kaayo, ilabi na kon ang palitan sa sakyanan, tua sa layo nga dapit.

“Daghan na nga nailad, abi nila nga swerte na kay nakakita og barato nga sakyanan, kompleto sa papeles, apan diay gipang-alisdan na ang engine ug chassis number kay diay gikan sa carnap,” pasabut ni Sayson, kinsa maoy mipatim-aw sa SIBIA sa ngalan sa ilang labaw dinhi sa Bohol.

Didto sa programa, bahad sa mga tinugyanan, kon barato ra kayo, hunahunaa kon ngano nga gibaligya nga barato.

Ang pahimangno, naglakip usab sa kadtong gihanyagan nga maoy patiwason og bayad sa binuwan nga hatagon aron maimpas ang sakyanan.

“Daghan na usab nga hitabo nga ang nagbaligya sa sakyanan, dili diay maoy tag-iya,” matud niya. 

Nangabang ra diay og tinag-as nga panahon, unya nagpahimo og peke nga dokumento aron mahalin. Unya na mahibaw-an nga kinawat diay ang sakyanan nga wala na ang nagbaligya.

Kon makaadto sa HPG, himoan og record check ang sakyanan kon kinsa gyud ang tag-iya, unsay mga salaod nga naapilan niini, duna bay nangita niini nga laing tag-iya, ug duna bay mga traffic violations nga wala mabayri, matud ni Sayson.

Naglakip na usab sa gipahibaw ni Sayson ang mga buot magpapuli og kolor sa mga sakyanan, kay kon dili magtugma ang kolor sa sakyanan kay sa color nga naa sa rehistro sa sakyanan, pwede kini nga dakpon.

Duawa kami sa Campo Dagohoy, adto sa HPG aron maseguro nga nag hinaguan nga kwarta, dili masayang, aghat ni Sayson. (RAHC/PIA7 Bohol)