TAGBILARAN CITY, Bohol, Feb. 20 (PIA) -- Ang Philippine Statistics Authority (PSA) sa Bohol nanawagan og suporta sa publiko alang sa 2023 National Information and Communications Technology (ICT) Household Survey (NICTHS).

Ang PSA nihimo niini nga survey sa unang higayon sa pakigtambayayong sa Department of Information and Communications Technology (DICT).

Ang 2023 NICTHS usa ka mahinungdanong lakang sa pagsulbad sa kakulang sa estadistika sa panginahanglan sa ICT sa nasud.

Kini nga mga istatistika sa ICT kritikal sa pag-ila sa mga estratehiya alang sa pagpalambo sa mga serbisyo sa e-government ug ang mga proseso sa pagpauswag, pagplano ug pagmonitor niini.

Dugang pa, kini adunay hinungdanon nga papel sa e-business, ingon man mga serbisyo sa pagbangko ug pinansyal.

Niini, gidasig ni PSA-Bohol Chief Statistical Specialist Jessamyn Anne C. Alcazaren ang tanan nilang mga respondents sa tinuoray nga pagtubag sa mga pangutana nga ipangutana sa ilang field personnel.

Alang sa lalawigan sa Bohol, upat ka field personnel ang gipakatap aron sa pagdumala sa tulo ka mga questionnaire ug pagsiguro sa confidentiality sa tanang nakolekta nga datos.

Matud pa nga usa ka barangay questionnaire ang ihatag sa barangay kapitan o bisan kinsang opisyal sa mga sample barangay.

Sa laing bahin, usa ka household ug usa ka individual questionnaire ang ihatag sa household head o bisan kinsa nga hamtong nga miyembro sa panimalay sa mga sample households ug random nga gipili nga mga indibidwal sa panimalay.

Ang mga datos nga matigom naglakip sa ICT use ug access, ICT skills, digital economy, technology enabled incidents, e-waste, sim card registration, ug uban pang indicators sama sa functional difficulties tungod sa health problems, artificial intelligence, emergency ug disaster preparedness, ug uban pa.

Alang  sa dugang nga impormasyon ug pinakaulahing anunsyo, mahimong mobisita sa opisyal nga PSA website sa https://psa.gov.ph/. (ECB/PIA7-Bohol)