TAGBILARAN CITY, Bohol, Feb. 20 (PIA) – Negosyante ka ba nga ang gigamit nga puhunan wala makaabut sa P3 milyones?
Kon ikaw kini, nasayud ka ba nga mahimo nga dili ka kinahanglang mohatag sa minimum nga inadlaw nga suholan basta dili sila makaabut og napulo ang trabahante, ug mahimo pa nga dili ka mobayad og buhis sa kita nga makuha gikan sa imong negosyo, sulod sa duha ka tuig?
Pinaagi sa pagparehistro sa Barangay Micro Business Enterprise (BMBE), kini nga nahisgutan, kabahin lamang sa mga insentibo nga matagamtam sa mga namuhunan sa ginagmay nga negosyo, butyag sa Department of Trade and industry (DTI) pinaagi ni John Jescio Liquit, business counselor.
Didto sa Technical Advisory Visit (TAV) orientation nga gihimo sa Department of Labor and Employment (DOLE) Bohol Field Office alang sa mga micro, small ug medium enterprise owners ug employers sa Distrito sa Cogon ning syudad, si Liquit mihatag usab sa BMBE orientation, alang sa mga gagmay nga mamumuhunan nga pwede nga mosakay sa kahigayunan nga makatigum og mas daku-dako sa ilang kinitaan.
“Gawas sa kahigayunan nga dili estriktong mapasubay sa minimum wage law ug eksempyon sa income tax gikan sa kinitaan gikan sa pagdumala sa gamay nga negosyo, daghan pang pwede nga makuha sa us aka gamay nga mamumuhunan nga rehistrado sa BMBE,” matud niya.
Basta marehistro sa BMBE, mahimo man nga dili mapugos og tuman sa minimum wage law, kinahanglan hinuon gihapon nga hatagan ang mga empleyado o trabahante sa benepisyo sama sa Social Security System, PhilHealth ug PAG-IBIG memberships.
Kon marehistro sa BMBE, mahatagan usab ang negosyo sa prayoridad sa espesyal nga mga pahuwam nga gitagana alang sa mga BMBE.
Gawas pa, makakuha usab sila sa mga kahibalo ug kasayuran sa mga teknolohiya ug pamaagi sa pagpadagan sa negosyo, bansaybansay sa pagpadaghan sa abut sa produksyon ug pagdumala sa negosyo, abag sa pagpamaligya sa abut, segun sa natala sa BMBE Law.
Dugang pa, kon rehistrado sa BMBE, mahimo pa nga mapaluag-luagan sa mga balayronon sa munisipyo sa mga permits ug lisensya kon dili man ugaling kaya sa LGU nga librehon na ang tanan nga balayranan sa negosyante.
Hinuon, makaparehistro lamang sa BMBE kon may nakuha nga nga DTI business name, rehistrado sa Securities and Exchange Commission kon corporasyon o sa Cooperative Development Authority, alang sa mga kooperatiba, matud ni Liquit.
Niini, alang sa mga negosyante nga pwede makaparehistro sa BMBE, pwede nga mobisita sa 22 ka mga Negosyo Centers lukop sa Bohol, o moadto sa DTI Bohol aron mapasabut og tarung. (PIA Bohol)
