TAGBILARAN CITY, Bohol, Feb. 20 (PIA) -- Gisugdan sa Department of Labor and Employment (DOLE) Bohol Field Office ang una sa daghanan nga mga technical advisory visits (TAV) nga himoon aron magiyahan ang mga micro, small ug medium enterprises (MSME) sa mga lagda sama sa labor standards ug mga balaod subay sa Labor Code of the Philippines.

Didto sa Saulog Gym sa Tagbilaran City, Pebrero 20, mismo si Bohol Chief Labor and Employment Officer Ma. Eloida Cantona, ang nanguna sa DOLE, kinsa giduyugan usab sa mga ahensya sa kagamhanan nga may kalambigitan sa pamuhunan, pagpanarbaho ug mga katungod ug benepisyo sa mga trabahante alang sa serbisyo nga mahuha sa usa  ka lugar lamang.  

Singkwenta sais ka mga tag-iyahag mga gagmay nga negosyo nga ang capitalization anaa na sa P15 million paubos ang mingtambong aron usab ilang masayran kon unsa pa ang ilang mga gikinahanglan aron ang ilang mga negosyo ug pamuhunan, makapasar sa mga sumbanan sa pagpanarbaho (labor standards), nagsubay sa mga balaod sa pagpanarbaho (labor laws) ubos sa DOLE Department Order No. 238 series of 2023.

Ang nasampit nga Department Order, giila nga Rules on the Administration and Enforcement of Labor Standards pursuant to Article 128 sa Labor Code of the Philippines.

Kini ang naggahum sa DOLE nga maoy magpatuman sa balaod sa pagpanarbaho pinaagi sa Labor Inspection ug Occupational Safety and Health Investigations.

Sa katungod sa mga mitambong, gipaambit ni Grace Auguis, tag-iyahan og boarding house sa Cogon District nga “daku kaayo og tabang ang TAV nga mapahibaw ang mga negosyante sa ilang obligasyon, ug uban pang kasayuran nga importante sa pagpatunhay sa luwas nga negosyo ug malipayon nga mga trabahante.”  

Una nga ga gipasabut ni Cantona nga ang TAV orientation makagiya ug makaagak sa mga establisemento nga may 9 ka trabahante pa-ubos sa ilang mga tulumanon sa balaod aron kapanalipdan ang mga trabahante pinaagi sa pagtuman sa mga balaod sa pagpanarbaho ug luwas nga trabahoan.

Uban usab sa Department of Trade and Industry, gisaysay ni John Jescio Liquit, business counselor, nga kadtong mga establisemento nga may capital nga ubos sa P3 milyones, mahimong magparehistro aron makatagamtam sa bugkos sa mga benepisyo alang sa mga gagmay nga negosyo subay sa Barangay Micro Business Enterprises Law.

Gihisgutan usab didto pinaagi ni DOLE Bohol Labor Inspector Liezel Hadassah Cadua  ang mga benepisyo sa alang sa mga trabahante, ug kanus-a sila pwede nga mo-avail niini.

“Daku kayo og gikatabang, daghan ko og nahibaw-an sama sa pagkwenta sa 13th month pay. Wa ko kahibaw niadto nga I divide pa diay, isipon na lang nako nga pinaskohan to sa akong trabahante ang sa 2023,” butyag ni Maria Luisa Saguirel, negosyante sa laundry shop.

Iya usab nga gipaambit nga nasayud na siya unsay buhaton sa mga trabahante nga maoy magbuot sa oras itrabaho, magpataka og overtime nga dili aprobado ug dili mosakto sa oras sa trabaho.

“Maayu ra gyud nga mitambong ko sa TAV,” panapos niya. (PIA Bohol)