PANGLAO, Bohol, Feb. 26 (PIA) -- Giabi-abi sa lalawigan sa Bohol ang kapin sa 300 ka partisipante nga gilangkoban sa mga mag-uuma, tag-iya og umahan ug mahiligon sa pagpanguma gikan sa lain-laing rehiyon sa nasud ug gikan sa gawas sa nasud sa ika-7 nga edisyon sa Philippine Farm Tourism Conference nga gibuksan adlaw’ng Lunes, Pebrero 26, 2024, sa Bellevue Resort sa lungsod sa Panglao.
Ang kaugalingong potensyal sa Bohol isip investment area maoy usa ka taas nga punto sa komperensya samtang ilang hisgotan ang mga palaaboton sa negosyo sa turismo sa uma.
Gipasiugdahan sa Panggamhanan sa Lalawigan sa Bohol, ang komperensya, nga may temang “Farm Tourism: Consciousness for Healthy Living and New Experiences,” magpakita sa mga nakat-onan gikan sa pandemya, ug magpaambit sa labing maayo nga mga gawi, nga nagtinguha sa paghatag og sosyal ug ekonomikanhong empowerment sa mga komunidad sa panguma.
“Uban sa atong tema nga Farm Tourism: Consciousness for Healthy Living and New Experiences, nasayod ko nga kining panagtapok maghatag kanato og dugang kaalam sa atong mga best practices ug motibasyon samtang atong palig-onon ang atong sektor sa agrikultura ug turismo,” mensahe ni Gob. Erico Aristotle Aumentado atol sa pagbukas sa programa.
Gidugang pa sa gobernador nga kini usab nga mga kahigayonan alang sa dugang kalamboan sa atong ekonomiya.
Si Kanhi Tourism Secretary ug karon International School of Sustainable Tourism (ISST) chairman ug president Dr. Mina Gador miingon nga ang komperensya karong tuiga magtutok sa malungtarong pagtubo pinaagi sa pagtikad sa mga prutasan ug utanon nga umahan, aquaculture ug artisanal fisheries, ug green investments sa farm tourism.
Ang mga hilisgotan sa 3 ka adlaw nga confab naglakip sa industriya sa pagkamaabiabihon nga nagsagop sa malungtarong konsepto sa farm-to-table, pagproseso sa mga prutas ug utanon - yawe sa seguridad sa pagkaon, husto nga pagpamaligya ug kita, dugang nga mga benepisyo sa artisanal nga pangisda, pagbag-o sa multi- milyon ka pesos nga seaweeds industry, ang pompano fish isip umaabot nga star of aquaculture, ug green investment sa agrikultura ug turismo sa Asian setting.
Ang confab aduna usab usa ka exhibition area nga gipangulohan sa Department of Trade and Industry (DTI) diin gipakita ang mga produkto sa agrikultura ug ubang mga produkto.
Ang komperensya maghatag usab sa 4th Lakbay Bukid Awards sa lima ka lokal ug langyaw nga indibidwal ug organisasyon nga nakatampo sa pagpalambo sa turismo sa uma sa Asya. (ECB/PIA7-Bohol)
