SYUDAD SANG ROXAS, Capiz (PIA) -- Nagpatigayon sang skills training workshop ang Technical Education and Skills Development Authority (TESDA)- Capiz kag ang lokal nga pangulohan sang Tapaz para sa 17 ka mga persons with disabilities (PWDs).

Ini kaangot sa panugyan kag tinutuyo sang Tapaz nga mapaumwad, mahatagan sang praktikal nga paghanas ang mga PWDs, kag mabuligan sila nga mangin "economic dependent."

Nagpasalamat man sa TESDA kag LGU si Neniel Gicole, 36 years old kag isa man sa mga benepisyaro sang skills training halin sa Barangay Taslan. 

“Hanggod gid ang amon pagpasalamat sa training nga gintao sang TESDA kay makabulig gid sa amon pang adlaw-adlaw nga pangabuhi kag makapreparar sa amon kung mag-apply kami sang ubra,” suno kay Gicole, kag iya man gindayaw si Mayor Roberto Palomar, amu man ang Persons with Disabilities Affairs Office, kag ang Municipal Social Welfare and Development Office sa pagpatigayon sang skills training para sa ila nga PWDs.

Kaangot diri, nagpatigayon man sang isa pagid ka skills training program ang LGU Tapaz kag TESDA para sa pamilya sang mga PWDs. 

Sa iya bahin, nagpahayag si Tapaz Mayor Palomar nga importante nga mahatagan sang importansya kag mahatagan sing husto nga pagtamod ang mga marginalized sectors sang komunidad pinaagi sa mga skills training programs.

“Ang pagfocus sa role sang edukasyon kag skills development makabulig sa paglab-ot sang kauswagan kag magahatag sang nagakaangay nga oportunidad sa tagsa ka miyembro sang sosyodad," dugang ni Palomar. (AGP/PLF/PIA Capiz)