MANILA, February 27 (PIA) -- Gilagdaan ni Presidente Ferdinand R. Marcos Jr. isip balaod ang Republic Act 11981, o ang Tatak Pinoy (Proudly Filipino) Act.

Ang seremonya sa paglagda sa balaodnon gipahigayon sa ceremonial hall sa Palasyo sa Malacañang niadtong Lunes, Pebrero 26, dungan usab sa paglagda sa gipalapdan nga Centenarian Law o Republic Act No. 11982.

Ang Tatak Pinoy (Proudly Filipino) Act nagpasiugda sa inklusibo nga pagtubo sa ekonomiya ug kalamboan sa nasud pinaagi sa pag-awhag, pagsuporta, ug pagpasiugda sa produksyon ug pagtanyag sa mga lokal nga produkto ug serbisyo.

Ang nasangpit nga balaod makapalig-on sa katakus ug talento sa mga Pilipino.

Gipahibalo pa sa Pangulo nga ang "Tatak Pinoy" labaw pa sa usa ka branding exercise.

Matud niya, mahitungod kini sa paghatag og insentibo sa mga lokal nga produkto nga mapasigarbuhon nga gihimo sa mga Pilipino o mga trademark sa Pilipinas.

Kini nagpakita sa pagkamamugnaon ug abilidad sa mamumuong Pilipino.

“It is about creating products and services of the highest quality, because Tatak Pinoy is also about excellence, and as a seal of great workmanship,” pamahayag pa sa Pangulo.

Usa ka Tatak Pinoy Strategy ang himoon, nga magsilbi nga roadmap sa mga ahensya sa gobyerno, local government units (LGUs), ug pribadong sektor aron matuman ang mga tumong niining bag-ong balaod.

Sa paglagda sa balaod, gipasiugda ni Marcos ang suporta sa gobyerno ngadto sa mga Pilipinong negosyante aron mapahibalo ang trabahong Pilipino sa tibuok kalibutan, ug mapadasig ang ekonomiya sa nasud. (ECB/PIA7 Bohol)