TAGBILARAN CITY, Bohol, February 20 (PIA)--Usa ka 50 ektaryang corn model farm nga proyekto ang itukod sa Department of Agriculture (DA) sa dili madugay sa lungsod sa Danao.

Atol sa courtesy meeting uban ni Danao Mayor Jose G. Cepedoza, gipresentar ni Agricultural Program Coordinating Officer (APCO) Roman Dabalos ang plano sa pagtukod og 50 ka ektarya nga corn model farm sa usa sa mga barangay sa Danao nga magsugod karong ikaduhang kwarter sa tuig.

Si Cepedoza nipadayag sa iyang kalipay kalabot sa maong proyekto nga matukod sa iyang lungsod diin matud pa niini nga makapataas sa panginabuhian sa mga mag-uuma sa mais sa lungsod.

Sa pakigtagbo sa Cantubod Farmers Development Association (CFDA) alang sa corn model farm, si CFDA President Jomar S. Ayenza, nipadayag sa iyang kinasingkasing nga pagpasalamat nga adunay matukod nga proyekto sa ilang lugar ug ilang asosasyon isip mga benepisyaryo.

“Daku kaayu akong pasalamat sa Department of Agriculture kay gihatagan mig maayung mga impormasyon nga nag hisgot sa corn, kay atung produksyon sa corn mubo jud. Mao nga atung tabangan ug ipakita nga worth it ang ilang mga tabang kanato, dapat musaka kini,” matud pa ni Ayenza.

Si Municipal Agriculturist Zosemilito A. Digal, nihatag usab og tambag sa mga mag-uuma.

“Sa ilang gihatag nga proyekto atung paningkamutan nga mo-uswag ang kapunongan ug ang mga miyembro niini, ako kanunay’ng gi balik-balik nga naa dapat kamo mag tinabangay, sinabtanay ug ang pinaka importanti ang transparency. Pasalamatan natug dako ang DA sa kanunay magdala ug mga kaayuhan,” matud pa ni Digal. (ecb/PIA7-Bohol)