MALAYBALAY CITY (PIA)--Gidawat bag-ohay pa lang ni Mayor Pablo Lorenzo III ang 4000-liter capacity Firetruck ug usa ka unit nga Patrol Car atol sa ‘Blessing and Turnover Ceremony’ nga gipahigayon sa Libertad, Quezon Bukidnon.
Mitambong sa maong seremonya sila Senate Spouses Foundation Inc. (SSFI) President Audrey Tan-Zubiri isip representante ni Senate President Juan Miguel Zubiri, Provincial Fire Marshal Jack Bigwil, Quezon Municipal Fire Marshal Aldrin Sabellano, Vice Mayor Joseph Durotan, Board Members Ben Baguio ug Joseph Palmada, mga konsehal sa lungsod, ug mga opisyales sa munisipyo.
Gihatagan og gibug-aton ni Fire Marshal Bigwil ang ka-importante sa firetruck tungod kay ang ekipo sa mga bumbero kulang gyud alang sa pagpatuman sa ilahang katungdanan.
Iya usab gipasalamatan si SSFI President Inday Audrey Zubiri ug si Senate President Migz Zubiri, nga maoy naniguro nga mahatagan gyud ang Quezon ug dugang ekipo.
Si Mayor Pablo M. Lorenzo III, kauban si Senate Spouses Foundation president Inday Audrey Zubiri atol sa turnover sa maong ekipo sa Bureau of Fire Protection nga gidawat ni Senior Fire Officer Aldrin V. Sabellano. (Photo courtesy of Quezon LGU)
Malaumon si SSFI President Audrey Zubiri nga ang bag-ong kagamitan mapuslan sa lungsod hilabi na kung dunay emerhensya.
“Si Senator Migz kanunay naghunahuna sa inyong kaayohan, ug aron usab masukli-an ang mga bumbero sa ilang mga sakripisyo, kusog, kakugi, ug kaisog diha sa ilang pagpangalagad sa katawhan. Mao nga angayan lamang nga “top-of-the-line” ug mga moderno nga ekipo ang madawat sa inyong lungsod,” dugang ni SSFI president Audrey Zubiri.
Sa iyang mensahe, nagbalik-lantaw si Mayor Poling Lorenzo sa kasinatian sa lungsod kaniadtong wala pa kini’y igo ug bag-o nga mga ekipo. Mao nga dako ang iyang pagpaningkamot nga makapalit ang LGU og bag-ong firetruck.
“Salamat sa kakugi ni Senator Zubiri, dakong tabang kining mga firetruck tungod kay mahinungdanon nga atong maangkon kining bag-o nga mga equipment. Hinuon, manghina-ut kita nga wala'y mo-abot nga panghitabo ug katalagman sa atong lungsod,” matud sa mayor.
Kanunay nga nagpasalamat ang lokal nga kagamhanan sa Quezon ngadto sa mga katawhan nga nagpaluyo sa mga kalampusan sa lungsod.
Tungod niini, mas nahatagan lamang og dugang kusog ug kadasig ang mga opisyales ug mga empleyado sa madasigong pagpangalagad pinaagi niining firetruck ug patrol car nga gitugyan sa lungsod.
Matud sa mayor nga bisan pa man sa mga moderno ug dekalidad nga mga ekipo ug pasilidad, anaa usab kanunay ang pahimangno ngadto sa mga lungsoranon sa pagpabilin nga mabinantayon ug maampingon aron malikayan ang mga disgrasya ug emeherhensiya. (JMC/PIA10/Bukidnon)
SSFI President, Audrey “Inday” Tan Zubiri nagpaabot sa iyang mensahe kabahin sa pag-turnover sa maong Firetruck og Police patrol car. Kini mahitungod sa pagpaningkamot nga mahatagan ug dugang pagtagad ang kakulangon sa ekipo sa lungsod kung dunay mahitabong emerhensya. (Photo courtesy of Quezon LGU)
