TAGBILARAN CITY, Bohol (PIA) -- Ang Bohol Employment and Placement Office-Public Employment Service Office (BEPO-PESO) nipahigayon sa ilang unang local ug overseas job fair niadtong Marso 2 sa Bohol Cultural Center sa syudad sa Tagbilaran.

Gitawag nga “abregana,” usa ka Bisaya nga pulong sa Kinatsila ang gigikanan nga nagpasabot og appetizer, ang kalihokan, nagsugod sa una sa tulo ka regular nga job fairs nga gipangunahan sa buhatan aron ma-accommodate ang mga Boholano nga nangitag trabaho ug mahatagan sila og kahigayonan nga makakita og trabaho sa lokal man o sa gawas sa nasud.

Ang maong aktibidad kabahin sa human capital ug workforce development ubos sa strategic governance roadmap sa Kagamhanan sa Probinsiya sa Bohol ubos sa pagpangulo ni Gob. Erico Aristotle Aumentado ug BEPO-PESO head Vilma Yorong.

Matud pa ni Yorong nga 24 ka local employers ug 10 ka overseas recruitment agencies ang nakig-alayon sa BEPO-PESO alang sa Abregana.

Unang na-hire on the spot mao si Leody Bason nga mi-apply isip service staff sa Alturas Group of Companies.

Si Aumentado, sa mensahe nga gibasa ni Board Member Lucille Lagunay, nipasalig nga ang kagamhanang probinsyal nagseguro sa maayong kinabuhi sa tanang Boholano.

Ang tulo ka job fairs nga Abregana, Sandugo ug CPG, kabahin sa mga paningkamot sa pag-abli sa mga kahigayonan sa pagtukod og malampuson nga kaugmaon, matud pa sa mensahe sa gobernador.

Gipasalamatan ni Aumentado ang mga partners, employers ug jobseekers, tungod kay ang ilang partisipasyon sa aktibidad nagpakita sa ilang kaandam nga motampo sa kalamboan sa probinsya.

Ang maong job fair agi og pakigtambayayong sa Department of Migrant Workers, Department of Labor and Employment, Overseas Workers Welfare Administration, Technical Education and Skills Development Authority, Social Security System ug ingon man sa PESO managers gikan sa mga kagamhanang munisipyo.

Alang sa mga interesadong mosalmot sa sunod pa nga mga job fairs, mahimong motawag sa telephone number 411-0138 local 43003 o ipadala ang ilang concerns sa bepobohol@gmail.com o bisitaha ang BEPO PESO Facebook page. (ECB/PIA7 Bohol)