TAGBILARAN CITY, Bohol (PIA) -- Aron makuha ang gibana-bana nga average nga abot sa usa ka ektarya nga luna sa humay alang sa panahon sa ting-init, gipagihayon ang crop cutting sa tulo ka humayan sa Barangay Buena Suerte ug Estaca sa lungsod sa Pilar nga gitamnan og inbred ug hybrid seeds.

Ang crop cut, nga gipahigayon sa Department of Agriculture (DA7) ubos sa Rice Program maoy magdeterminar sa banabana nga abot matag ektarya sa dili pa ang aktuwal nga pag-ani.

Sa crop cutting, tulo ka sample plot sa four-square meter matag sample ang giila sulod sa humayan aron mahimo ang aktuwal nga pag-ani, paggiok, paglimpyo ug pagtimbang. Ang resulta sa pagtimbang kwentahon aron makuha ang ma-ani matag ektarya.

Alang sa 1.0 ka ektarya nga humayan ni Teodora Ingking sa Buena Suerte, ang inbred nga NSIC Rc 440 nga barayti sa humay naghatag og gibana-bana nga ani nga 5.69 metriko tonelada sa usa ka ektarya (mt/ha), samtang ang resulta sa crop cut ni Remegio Wagas anaa sa 4.36 mt /ha gamit ang NSIC 402 variety.

Sa laing bahin, ang humayan ni Camelo Seloveres, Jr. sa Estaca, gamit ang hybrid (Bigante Plus) nihatag og resulta nga 5.82 mt/ha, base sa gi-furnish nga report gikan sa rice team nga maoy naghimo sa crop cutting.

“Dako kaayo akong pasalamat sa DA7 kay daghan silang natabang sa akong pag-uma sa paghatag nila’g abuno, binhi, ug uban pang assistance. Katung sauna nga wala pa ang mga suporta sa DA sa mga farmers dagko kaayu mig utang kay mahal kaayu ang abuno,” saysay pa ni Ofelia Tirol, mag-uuma og humay sa Barangay Estaca, lungsod sa Pilar.

Ang DA naghatag sa mga mag-uuma og agri-intervention nga naglakip sa mga abono, binhi sa humay, ug pinansyal nga tabang.

Parte kini sa pasalig ni Presidente Ferdinand R. Marcos Jr. sa mga Pilipinong mag-uuma sa suporta sa gobyerno aron masiguro ang kalamboan sa agrikultura sa Pilipinas taliwala sa mga hagit nga dala sa mga kalamidad nga hinimo sa tawo ug natural nga kalamidad sama sa El Niño phenomenon. (ECB/PIA7 Bohol)