DAKBAYAN SA TANDAG, Surigao del Sur -- Tumong karon sa kadumalahan sa Adela Serra Ty Memorial Medical Center (ASTMMC) nga makunhuran ang gidaghanon sa mga maitalang mamatay matag adlaw sa maong ospital.

Sa pakighinabi sa Radyo Pilipinas – Tandag, gibutyag ni Dr. Janice Pagaran – Alcordo, Medical Center Chief sa nasangpit nga balay-tambalanan, nga ilang gipaningkamotan nga unta anaa nalang sa isa o duha ang ilang mortality sulod sa usa ka semana.

Sumala pa nga sa nakalabay’ng lima ka adlaw, upat ang naitalang mortality sa ilang ospital tungod sa COVID-19 kung diin apil na niini ang usa ka tuig pa lamang nga bata.

Hinuon sa karon, adunay usa ka bakante nga higdaan sa ilang COVID-19 Critial Care Unit (CCU) samtang unom sa ilang ward.

Sumala pa nga taga-Surigao del Sur ang tanan nilang mga pasyente nga ila karong giatiman. Mapasalamaton nalang kini tungod kay wala pa’y laing variant sa COVID-19 ang naadmit karon sa ilang ospital.

Gipangandoy ni Dr. Alcordo nga unta mabakantehan na ang tibuok CCU aron nga makapahulay usab sila.

Mahinumduman nga ning nakalabay’ng bulan sa Mayo, nakatala ang ilang ospital og upat hangtud sa walo ka mortality sulod lang sa usa ka adlaw. (Raymond Samson Aplaya, RP1-Tandag/PIA-Surigao del Sur)