TANGUB CITY, Misamis Occidental (PIA)--Andam nang tabangan ang mga gagmay nga negosyante pinaagi sa Food Processing and Research Center Common Service Facility nga nahimutang sa Barangay Maloro sa Tangub kini human nga gibuksan, Hulyo 8.

Gipahayag ni Department of Trade and Industry (DTI) Assistant Regional Director Ruel Paclipan mga mukabat sa P2.5 milyones nga kantidad sa mga processing equipment ang gihatag sa ilang ahensiya aron makatabang sa pagpalambo sa mga ginagmay nga negosyo kon Micro, Small and Medium Enterprises (MSMEs) gikan sa pagproseso ngadto na sa packaging sailang produkto.

Si NMSCST College President Dr. Herbert Gleen Reyes mibutyag nga ubos sa ilang pagdumala naglaum sila nga dili lamang ang mga gagmay nga negosyante ang ilang matabangan apan lakip usab ang ilang mga tinun-an nga nagkuha sa kursong Food Technology ug Hospitality Management.

Gikalipay usab kini ni Tangub City Mayor Jennifer Tan nga ang programa sanglit dako kini nga tabang sa mga Tangubanon nga mapalambo pa ang mga negosyo gamit ang lokal nga produkto nga naa sa lalawigan.

Gipasalig usab ni Misamis Occidental Governor Philip Tan nga andam ang provincial government nga mutabang sa maong programa aron daghan ang makabenipisyo niini.

Nasayran gikan kang DTI Provincial Director Jane Marie Tabucan nga ang maong programa flagship program sa ilang ahensiya nga andam nga mutabang sa mga gamay nga negosyante.

Ang maong building ang gipanag-iya sa Lokal nga Kagamhanan sa Tangub nga maoy gibutangan sa mga kahimanan gikan sa DTI ug idumala ang pagpadagan sa maong CSF pinaagi usab sa NMSCST.

Lakip sa mga kahimanan nga ana sa CSF mao ang meat processing, bakery, packaging equipment, printer ingon man cutter. (LGU Tangub/PIA Misamis Occidental)