MALAYBALAY CITY (PIA)—Pinaagi sa recorded video material, mipasalamat si Commission on Population and Development (POPCOM)-region 10 Regional Director Neil Aldrin Omega ngadto kang Bukidnon Governor Jose Ma. R. Zubiri Jr. tungod sa kanunay nga suporta niini sa nasyonal nga mga kalihukan sa POPCOM, ilabi na sa Family Planning diin ang probinsya usa sa mga ‘top performing provinces’ nga nag-implementar sa maong programa sa nasud.
Atol sa Family Planning Month Celebration and Covenant Signing nga gipahigayon ning milabay’ng Agosto 10 sa Loiza’s Pavilion, Casisang, Malaybalay City, gibutyag ni Omega nga taliwala sa pandemyang dala sa COVID-19, nagkataas ang ihap sa unwanted pregnancies ilabi na sa mga kabataan.
Sumala sa research sa nagkalain-laing ahensya, misaka usab ang maternal mortalities ug gender-based violence sa mga urban areas.
Midugang siya pagpasabot nga ang pagsaulog sa Family Planning Month nagpahinumdom sa mga magti-ayon sa pagsunod sa hustong pagplano sa pamilya ug kabaskog sa ilang panglawas. Ang tema karong tuiga nga ‘Usap Tayo sa Family Planning’ naghatag ug kahigayonan sa matag pamilya nga mahisgutan ug mapalambo ang kahibalo kung unsa ka-importante ang Family Planning sa tagsa-tagsa ka pamilya.
Tungod niini, nanawagan usab si Omega sa mga kadagko-an sa local government units (LGUs) nga ipadayon ang mga programa sa Family Planning ug dili tugotan nga mabalda ang mga serbisyo niini taliwala sa mga nahitabong quarantine aron ma-undang ang pagkuyanap sa maong coronavirus.
Gidayeg usab ni Gov. Zubiri ang mga kawani sa Population Development Division sa provincial government sa ilang mga paningkamot nga mapaabot ang saktong edukasyon sa pagplano sa pamilya ngadto sa mga munisipyo ug barangay sa tibuok probinsya luyo sa nahitabong pandemya sa nasud.
Human sa mubo nga programa, gipahigayon dayon ang ‘covenant signing’ sa mga nagkalain-laing ahensya sa gobyerno diin gipangunahan ni Gov. Zubiri. Gihimo kini isip pagsaad sa kinatibuk-ang suporta diha sa implementasyon ug pag-‘promote’ sa “Responsible Parenthood and Reproductive Health (RPRH) Law of 2012” sugod sa tuig 2022 ug sa mosunod pang mga katuigan.
Ang maong kalihukan gitambungan nila ni Edgardo B. Catalan, Regional Manager for Mindanao USAID ReachHealth; Kapisanan ng mga Broadcaster sa Pilipinas (KBP) President Gino Armstrong Garcia; Municipal Health Officers; Municipal Population Program Officers; mga representante sa Provincial Health Office, Department of Health-Bukidnon, Philhealth, Sangguniag Kabataan-Bukidnon ug mga kawani sa PGO-Population and Development Division-Bukidnon, nga gipangunahan ni Population Program Officer Emily Marie Q. Estacio. (Provincial Govt/PIA 10-Bukidnon)
