CAGAYAN DE ORO CITY (PIA)--Malaumon ang mga kadagkoan ug personahe sa JR Borja General Hospital (JRBGH) nga dakong tabang alang sa COVID-19 response ang gisaad nga donasyon sa USAID RTI ReachHealth sa dili madugay.
Matud ni Dr. Ramon Moreno, chief of hospital sa JRBGH, nga nakita sa USAID ang dakong panginahanglanon sa hospital sanglit partner na man kini sa CDO LGU sugod sa administrasyon ni Mayor Oscar Moreno.
Lakip sa mga ekipo nga gi-submit sa JRBGH sa USAID ang dugang hospital beds, high flow respirator with accessories, mechanical ventilators, portable x-ray machine, cardiac monitors, defibrillators, suction machines, infusion pumps, CCTV cameras, rapid antigen test kits, UV box lakip nurses ug medical technologists.
Samtang, gibutyag ni Dr. Moreno nga nagpasalig na ang USAID sa maong mga requests ug naghulat na lang ang JRBGH sa pag-abot niini.
Ang JRBGH ubos pa gihapon sa Level I hospital nagdawat og mga COVID-19 positive patients bisan pa man nga dili COVID referral hospital.
Kahinumdoman nga anaa na sa Department of Health (DOH) ang application sa JRBGH nga mahimo na kining Level II hospital ug padayon pa niining gipalapdan ang inprastraktura aron pagtubag sa mga nanginahanglan og medical services dili lamang sa Cagayan de Oro apan lakip kasikbit nga probinsya. (CIO/PIA-10)
