MALAYBALAY CITY (PIA)—Gi-ila ug gipasidunggan ni Provincial Governor Jose Ma. R. Zubiri, Jr. ang tanang mga mananaog sa Lupong Tagapamayapa Incentives Awards (LTIA) ug Anti-Drug Abuse Council (ADAC) sa probinsya tungod sa ilang pagpaningkamot, dedikasyon ug mga inisyatibo nga mapabilin ang kahapsay sa ilang ginsakupan. Alayon kini sa gipahigayong awarding ceremony nga gidumala sa Department of the Interior and Local Government (DILG)-Bukidnon, niadtong katapusang semana sa Oktubre ning tuig didto sa Kaamulan Open Theater, Kaamulan Park, Malaybalay City, Bukidnon.
Sa mensahe ni Governor Zubiri, iyang gibutyag nga ang maong kalihukan usa sa iyang gikonsidera nga pinaka-importanteng higayon tungod kay mao kini ang panahon nga iyang mapasalamatan ang tanang lumilihok nga opisyal gikan sa kapulisan, kasundaluhan, PDEA agents ngadto na sa mga lumilihok sa barangay nga hini-usang naningkamot sa pagpabilin sa kalinaw ug kahapsay sa matag barangay, labi na ang padayong pagpakigbatok sa iligal nga druga diha sa drug-affected nga mga barangay.
Nakuha sa barangay San Jose, lungsod sa San Fernando ang 1st place alang sa 1st-3rd class municipality Category; 2nd place ang Brgy. Spring, Kibawe; 3rd place ang Butong, Quezon; ug nakakuha sa consolation prize ang Brgy. Freedom, Cabanglasan.
Samtang sa City Category, nakuha sa Brgy. Magsaysay, Malaybalay City ang 1st place ug nakuha usab sa Brgy. San Carlos, Valencia City and 2nd place.
Subay sa DILG Memorandum Circular 2016-85, ang nasangpit nga manana-og gi-ila ug gipili pinaagi sa lima (5) ka mga sumbanan nga mao ang Efficiency of Operations, effectiveness in Securing the Settlement of Interpersonal Dispute Objective of the Katarungang Pambarangay, Creativity and Resourcefulness of the Lupong Tagapamayapa, Area or facility for KP activities ug Financial and Non-Financial Support.
Gi-ila usab sa DILG Bukidnon ang lungsod sa Pangantucan, San Fernando, ug Kadingilan sa ilang padayong pakigbatok sa iligal nga druga diin ilang gihingusgan nga magpabilin nga drug-cleared ang ilang barangay nga apektado sa druga sukad sa tuig 2017 hangtud 2019. (PGO-PAIA/PIA-10/Bukidnon)
