November 17, 2021- Gipahigayon kaganinang buntag, Nobyembre 17 ning tuiga ang MOA (Memorandum of Agreement) Signing tali sa Department of the Interior and Local Government (DILG) pinaagi nila ni Regional Director (RD) Paisal O. Abutazil sa Rehiyon 9, RD Josephine Leysa sa Rehiyon 12, Mayor Darel Dexter T. Uy ning dakbayan sa Dipolog, Bangsamoro Autonomous Region For Muslim Mindanao pinaagi sa Ministry of the Interior and Local Government (BARMM)-MILG) ug mga kadagkoan sa mga line agencies niini, didto sa Misio Dei Hotel ning dakbayan.

Ang MOA signing nga gipahigayon adunay kalabutan sa pagpalig-on sa implementasyon sa ECLIP (Enhanced Comprehensive Local Integration Program) kansang tumong mao ang pagtabang sa mga walhong indibidwal nga mibalik na sa sabakan sa gobyerno aron makabaton sa haruhay ug malinawong kinabuhi ilawom sa sabakan sa balaod.
 
Kini ang gihimo atol sa gipahigayon nga duha ka adlaw’ng panagtigum sa nagkalain-laing ahensiya sa gobyerno pinangulohan sa DILG pinaagi sa “Stengthening Policy Adepthnesss of ECLIP Local Implementers on the New DILG-DNDJMC for the provision of DILG-Administered Package of Assistance for Former Violent Extremists (FVES)”.

Ning maong kalihukan, mihatag sa iyang mensahe si Mayor Uy, diin gipahayag niini nga usa kini ka dakong pribilihiyo sa dakbayan sa Dipolog, isip host city lakip na ang pagpartisipar niini ngadto sa mga importanteng kalihukan nga nagtumong sa pagtabang sa mga kanhi rebelde ug kanhi “violent extremists” dinha sa pagbag-o sa ilang kinabuhi ug pagpabalik sa ilang pagsalig sa gobyerno.
 
Dugang sa mayor nga kini sila nasalaag lamang tungod sa mga dili maong idiyolohiya nga ilang nasagap ug responsibilidad sa atong gobyerno nga agakon sila pagbalik aron mabag-o ang ilang kinabuhi.
 
Lakip sa mitambong sa nahisgutan nga kalihukan mao sila si USEC Marlo L. Iringan, Navy Capt. Ferdinand Buscato, DILG Provincial Director Oliver Ombus ug uban pang mga kadagkoan sa militar ug DILG. (EDT/PIA9-Zamboanga del Norte/photo and details by CIO Dipolog/cio-Ltd)