DIPOLOG CITY, Zamboanga del Norte, Dec. 24 (PIA) – Gipahigayon ang “Distribution of Food Packs” sa Kagamhanang Lokal kon pag-apod-apod sa mga “food packs” alang sa mga “senior citizens” ning dakbayan kagahapon, Disyembre 23, ning tuiga didto sa Office of the Senior Citizen Affairs (OSCA) Covered Court, Sta. Isabel, ning dakbayan sugod sa may alas-9:00 ang takna. Ang  maong kalihokan ang gipangunahan sa buhatan sa City Social Welfare and Development ubos sa pagdumala ni City Social Welfare and Development Officer, Ms. Arlene O. Jatico.

Ang nasangpit nga kalihokan ang gitambongan nila ni City Mayor Darel Dexter T. Uy, City Social Welfare and Development Officer, Ms. Arlene O. Jatico ug Federation of Senior Citizens Association of the Philippines (FSCAP) President, Mr. Cesar D. Caballero, kinsa mipabati sa ilang tagsa-tagsa ka mga mensahe atol sa kalihokan. 

Tipik sa mensahe ni Mayor Uy ang pasalamat sa padayong suporta gikan sa katawhan, uban sa pag-awhag alang sa pagpabakuna, duyog sa iyang tinguha nga mahiusa ang tanan alang sa kalamboan.

Nasayran nga ang mga “senior citizens” nga lumulupyo sa Brgy. Sta. Isabel, Sta. Filomena, Miputak, Olingan ug Estaka ang midawat sa nasangpit nga mga “food packs” didto sa OSCA Covered Court samtang ang ubang mga “food packs” ang gipang-apod-apod na sa tagsa-tagsa ka barangay diin nagpuyo ang nasangpit nga “senior citizen”.  (EDT/PIA9-Zamboanga del Norte/photos and details by CIO Dipolog/CIO-jnp)