MALAYBALAY CITY, Bukidnon (PIA)—Baynte tres (23) ka mga Persons with Disabilities kon PWDs ug Indigenous Peoples kon IPs sa Quezon, Bukidnon ang gigiyahan ug gibansay sa pagbuhat og maanindot nga ‘lei (garland)’ atol sa lima ka adlaw nga skills training sa Beads Making.

Kini nga training gipahigayon sa lokal nga pangagamhanan sugod niadtong petsa 2 hangtud petsa 6 sa Disyembre ning tuig pinaagi sa Livelihood Office ug koordinasyon sa Technical Education and Skills Development Authority (TESDA) .

Gitudlo-an sila sa mga pamaagi sa paghimo og lain-laing disenyo sa kuwintas gamit ang ‘beads’.

Sumala sa report sa Quezon Local Government Unit (LGU), migahin ang lokal nga kagamhanan sa Quezon, Bukidnon og pondo nga P1.2 Million alang sa paghatag dugang giya ug kahibalo pinaagi sa livelihood skills training.

Pinaagi niini, mahatagan sila og inspirasyon nga maningkamot sa kinabuhi gamit ang ilang kahibalo aron makatabang sa panginabuhi-an sa pamilya.

Kini nga kaalam makapa-uswag sa panginabuhi-an sa katawhan ug makapalambo sa ekonomiya sa lungsod. (LGU-Quezon/PIA Bukidnon)