TANGUB CITY, Misamis Occidental (PIA)--West Mindanao Command Chief nakigtagbo kang Misamis Occidental Governor Philip Tan arun ipaniguro nga andam ang kasundalohan sa pagpatuman sa usa ka hapsay ug malinawan nga lalawigan sa Misamis Occidental.
Mitugpa ang black hawk helicopter sa Philippine Army sa Tangub City Sports Complex sakay niini si Western Mindanao Command Chief Lt. General Alfredo Rosario Jr. mismong gisugat kini ni Governor Philip Tan, Huwebes sa Buntag niadtong Febrero 3.
Gipahayag ni Rosario nga ang iyang pagbisita dinhi sa MisOcc kabahin saiyang paglibot sa mga lugar nga anaa sa area of concern sa WestMinCom niining pamaagiha pamaniguro ngadto sa mga Misamisnon nga anaa kanunay ang kasundalohan arun mapatunhay ang kahapsay ug kalinaw ilabina niining nagsingabot nga piliay sa Mayo.
Gipunting pa sa maong opisyal nga subay sailing gihimo nga monitoring hapsay ug malinawon ang lalawigan ug gani wala kini maapil sailing gitawag nga areas of concern.
Sa iyang kabahin, gibutyag ni BGen Leonel Nicholas Commander 102nd Brigade 1st ID nga nalipay siya sa gihimo nga pagbisita ni Rosario sanglit iyang gipakita ang iyang concern sa mga Misamisnon dili lamang sa moabotaynga piniliay lakip pa sa uban pang mga kalihukan nga maghatag unya ug problema sa kahapsay ug kalinaw sa probinsya.
Dugang pa niini nga padayon nga ilang gitun-an kun adunay bay lugar sa MisOcc nga possible nga maapil sa areas of concern apan matud pa niini nga kun aduna man, aduna nay giandam nga mga lakang niini.
Gikalipay ni Tan ang pagbisita sa mga tag-as nga opisyal sa Philippine Army sanglit ilang nahisgutan ang kasamtangan mga programa sa probinsya ilabina ang kampanya sa insurgency diin gikalipay ni Rosario ang pag-abag kanila sa probinsyal nga kagamhanan sa MisOcc.
Mipasalig si Rosario nga motabang sa MisOcc nga makab-ot ang hapsay ug malinawon nga lalawigan ilabina sa moabotay nga piniliay nga naghatag ug kompyansa sa mga Misamisnon nga makab-ot niini ang usa ka safe ug secured nga probinsya. (Lambo Misamisnon/PIA-10/Misamis Occidental)
