Praesent commodo cursus magna, vel scelerisque nisl consectetur et. Nullam id dolor id nibh ultricies vehicula ut id elit.
MALAYBALAY CITY (PIA)—Gi-turnover sa Provincial Government of Bukidnon (PGB) ang bag-ong Regional Trial Court (RTC) Branch 11 Office Building ngadto sa RTC-Branch 11, pinaagi sa usa ka Blessing and Inauguration bag-ohay pa lang didto sa Tankulan, Manolo Fortich, Bukidnon.
Si Lawyer Paul Vincent G. Villegas, Provincial Legal Officer ug OIC Provincial Administrator, kinsa mitambong isip representante ni Governor Jose Ma. R. Zubiri Jr, mipaabot sa iyang pagtimbaya ngadto sa tibuok pwersa sa RTC Branch 11, pinangulohan ni Presiding Judge Hon. Jeanne Marie A. Abarrientos tungod sa malampusong pagtukod sa ilang bag-ong opisina.
Kinasingkasing usab nga nagpaabot si Judge Abarrientos sa iyang dakong pasalamat ngadto kang Governor Zubiri, Sangguniang Panlalawigan pinangulohan ni Vice Governor Rogelio N. Quiño, ug Municipal Mayor Clive D. Quiño tungod sa ilang walay hunong nga suporta aron mahatagan ug katumanan ang ilang gihandom nga opisina ug mapalambo pa ang ilang serbisyo ngadto sa mga kalungsurang sakop sa 1st District o Northern part sa Bukidnon. Dugang pahayag niini nga pagka-ugma mismo—human sa blessing ug inauguration—magamit na nila ang court room alang sa ilang mga nakahan-ay nga hearing.
Sa data gikan sa Provincial Project Monitoring and Inspectorate Team (PPMIT), mokabat sa kapin singko milyones ka pesos ang gibubo nga pundo sa probinsya alang sa construction of Hall of Justice Phase I nga gisugdan sa tuig 2018; Phase II nga gisugdan sa tuig 2020; ug construction of perimeter fence nga gisugdan sa susamang tuig.
Mitambong usab sa maong kalihukan ang mga mayores sa 1st district nga sila si Mayor Clive Quiño sa Manolo Fortich, Mayor Osmundo N. dela Rosa sa Malitbog, Mayor Vergito O. Factura sa Talakag, Mayor Aurelio B. Lopez ug Vice-Mayor Leonardo Genesis T. Calingasan sa Libona. Mitambong usab sila si Fiscal Aldrich Uayan ug Fiscal Kristofferlean Miole nga gikan sa Provincial Prosecutors Office, Atty. Reymund Inihao gikan sa Public Attorney’s Office, personahe gikan sa Parole & Probation Office, PNP, Bureau of Jail Management and Penology (BJMP), ug Community Environment & Natural Resources Office sa Manolo Fortich. (PGO-PAIA/PIA-10/Bukidnon)
