MALAYBALAY CITY, Bukidnon (PIA)—Gipasundayag ang Culture and Arts sa probinsya sa Bukidnon atol sa gipahigayong ‘Madagaya Trade Fair’ sa Provincial Government of Bukidnon (PGB), pinaagi sa Provincial Tourism Division, sa pakigtimbayayong sa Department of Trade & Industry (DTI)- Bukidnon sugod ning milabay’ng Marso 25 hangtud Abril 3, sa Robinson’s Place, Valencia City, Bukidnon.

Nahimo kining kahigayonan nga mapasundayag ug maila ang mga mga de-kalidad nga lokal nga produkto sa Bukidnon nga mao ang gi-display nga ginama sa mga Micro, Small, and Medium Enterprises (MSMEs) nga misalmot gikan sa Local Government Units ning probinsya.

Ang mga lokal nga produkto naglakip sa coffee-based products, pineapple-based products, cacao-based products, wearable, homestyle & crafts, ug uban pang mga produkto nga pinasahi ug wala sa ubang lugar.

Nakuha sa syudad sa Malaybalay ang special award alang sa Best-Selling Booth, samtang nakuha usab sa syudad sa Valencia ang Best Dressed Booth nga midawat sa usa ka plaque ug certificate gikan sa DTI ug PGB.

Mikabat sa 14 ka mga Local Government Units ang misalmot nga mao ang mga mosunod: syudad sa Malaybalay ug Valencia, mga lungsod sa Impasug-ong, Maramag, Cabanglasan, Kadingilan, Quezon, Talakag, Libona, Don Carlos, Kibawe, Pangantucan, Manolo Fortich ug San Fernando, nga mihimo usab ug pasundayag sa nagkadaiyang sayaw nga gi-umol sa pito (7) ka mga tribo sa probinsya. (PGB/PIA 10-Bukidnon)