April 26, 2022- Anaa na karon sa kustodiya sa Treasurer’s Office ning dakbayan sa Dipolog ang “Official Ballots” nga gamiton alang sa piniliay karong Mayo 9 ning tuiga.
Kini human gihatod sa F2 Logistics, ang nasangpit nga mga balota sayo kaganinang buntag, Abril 26 ning tuiga. Nasayran nga ang F2 Logistics maoy official courier sa Comelec alang sa paghatod sa mga balota, vote-counting machines ug uban pang mga supplies nga kinahanglanon sa eleksiyon.
Si Atty. Jed M. Labador, COMELEC Officer ning dakbayan, ang mibutyag nga adunay 131 ka mga boxes sa “Official Ballots”, ang gi-deliver ngadto sa Treasurer’s Office alang sa 131 ka mga clustered precincts dinhi sa dakbayan.
Silyado ang mga “Offical Ballots” sa dihang giturn-over kini ngadto ni City Treasurer Betty B. Oriola nga gisaksihan ni Atty. Labador ug mga personahe gikan sa Dipolog PNP ug pipila ka kawani sa kagamhanang lokal sa Dipolog. (cio-Ltd)
