OZAMIZ CITY, Misamis Occidental (PIA)--Walo ka mga drug personalities nga naggikan sa Lanao, Clarin, ug barangay Calabayan, Tinago, Pulot, ug Villa Consuelo dinhi sa Ozamiz City, ang nasikop sa gipahigayon nga joint drug buy-bust operation sa mga operatiba sa Ozamiz City Police Station pinangulohan ni Ozamiz City Acting COP PMaj Dennis Tano ug mga police agents sa Provincial Drug Enforcement Unit (PDEU) nga gipangulohan ni PLt Elwood Malanog, pasado alas 9:00 sa gabii, Mayo 21, 2022.

Target sa operasyon ang usa ka ginganlan ug Mary Ann nga nag-abang sa Celdran boarding house, Purok Mauswagon, Barangay Maningcol, Ozamiz City.

Nasikop uban sa suspetsado ang tulo pa ka mga babaye ug upat ka mga lalaki nga naaktuhan nga nag-pot session sulod sa nahisgutan nga boarding house.

Nakuha sa ilang posesyon ang mga sachets sa gituohang shabu ug mga drug paraphernalia.

Temporaryong gibalhog sa Ozamiz City Police Station detention cell ang mga nasikop samtang giandam pa ang nahiangay nga mga kaso nga ipasaka batok kanila. (AONC/PIA-10/Misamis Occidental)