CAGAYAN DE ORO CITY (PIA)--Malampuson nga nadakpan sa kapulisan sa Police Station 4 Cagayan de Oro City Police Office (PS4-COCPO) si alyas Jay Lagrimas, lalaki, 30 anyos, sa gipahigayon nga Philippine National Police-Department of Social Welfare and Development (PNP-DSWD) joint entrapment operation atong buntag sa Hulyo 19, 2022, sa Barangay Balulang ning syudad.

Balhog sa bilanggoan ang suspetsado human nagtakuban kini nga usa ka trabahante sa DSWD NCR kinsa nagpaila nga si Jay Lagrimas ug naglibot sa dakbayan sa Cagayan de Oro aron mangita og mga mabiktima. Nangolekta kini og kwarta bugti sa pagpasalig nga makadawat og ayuda sa DSWD ilalom sa nagkalain-laing programa sa DSWD, sama sa Assistance to Individual in Crisis Situation (AICS) ug Social Amelioration Program (SAP).

Atol sa pakighinabi sa kapulisan, balor P500 ang pangayo ni Lagrimas aron ingnon marehistro sa educational assistance. Samtang P300 ang kolekta sa gusto makadawat og SAP.

Nakuha gikan sa posisyon sa suspetsado ang mga peke nga DSWD NCR ID, peke nga DSWD Red Vest, mga pekeng papeles sa AICS, Social Amelioration Cards, ug giingon nga forms aron mahimong sakop sa 4Ps.

Nahibaw-an nga aduna pay laing kuyog ang suspetsado nga nagtago-tago karon sa syudad. Gibutyag usab nga adunay silay parihong lihok sa Bohol, Iloilo ug sa dabayan sa Quezon City ug Mandaluyong.

Mapasalamaton is DSWD Field Office 10 Regional Director Mari-Flor A. Dollaga sa kapulisan nga dali nga mi-aksyon sa reklamo sa mga silingan sa suspetsado.

“Daku kaayo kini nga kadaugan dili lang para sa buhatan sa DSWD Region 10, apan labaw na sa mga naglisod natong mga kaigsoonan nga nabiktima sa pagpangilad. Ako nalang hangyo sa uban pang nabiktima nga muduol sa COCPO o saamong ahensya para makapasaka og saktong kaso ug matagaan sa igong hustisya,” butyag ni Director Dollaga.

Gikatakdang pasakaan og kaso sa kalapasan sa Usurpation of Authority ug Falsification of Public Documents ang suspetsado. (DSWD-10/PIA-10)